الرّجالْ بْحالْ الجّفـّافْ ...!
جا ، " هُوَ " وْمْراتو ، عِنـْدْ بَنـْتو ، حيتْ بَنـْـتو ، كانـْتْ عْلى بابْ الطـْلاقْ !
وْداكْ ، النْهارْ دازَتْ فَلـْمَحْكـَمَـةْ مْعَ رَجَلـْها ، جا باشْ يْرَقـّعْ المُشكِـلْ !
وَ مْراتو "هي" شَعـاّلْتْ لعْوافي ، بْـغاتْ بَنـْتـْها تـْسَيـْطرْ عْـلى الرّجْلْ !
حيتْ " هِيَ "مْسَيْطـْرَة عْـلى بّاها ، وكانْتْ شَعاّلتْ لـَعْوافي مَـخْلوعَة !
عْلى بَنـْتـْها وَسْحابَة الدّموعْ مَالْئـة عَيْـنيها ، والعْشا لِكلاوْ عَـنْـدْ بـَنـْتهُمْ !
كانْ ، كايَنْحَرْ بالْـمَلحة ، بْـقاتْ غـيِرْ تـْبَرْقـَقْ بْعَيْنيها !
وْكانْـتْ جالْسَة ف الصّالون ، بْحالْ شي عَسـّاسَة عْلى الرّزامي فْ الحَمـّامْ !
وبْـحالْ شي لـَفـْـعَـة قرْطيطـَة ، كانْـتْ نْـساتْ سَـمّها ، مْنينْ مْشاتْ تـْشرَبْ الْـما !
كانَتْ مْـحَسّرَة ، وْمَلامَحْها تـْعبّرْ ، عْلى فـَشَلـْها فْ طـَريقـَة تـَوْجيه بَنْـتـْها !
باشْ تـَسْـتـَقـَرْ ، فْ بيتْ حَياتـْها الزّوجِيّة !
مَرّة تـَرْمي كـَلـْمَة تـْحاوْلْ تـَصْلـَحْ ما فـْسَدْ ، مَرّة تـْكونْ بْـحالْ البَكـْمَة !
وْمَرّة تـَطـْلـَعْ ريحْة الفلـْفلَة حارّة مَنْ ذاثـْها ، وْهِي كـَتـَهْمَسْ فْ وْدَنْ بَنـْتـْها !
وْبَـعدْ لَعْـشَا ، وْشُرْبْ الشّايْ ، فْ ساعة مْتأخرَة منَ الليلْ !
وْزَوْجْها يْلـَزمو يْنامْ ، وَلأنـّه فْ الصْباحْ يْروحْ للعَمَلْ !
جَمْعو الوَقـْفَة ، وَمْعَ لْخـَرْجَة دْلبابْ !
قالْ : النّـسيبْ لـزَوْجْ بَنـْتو ، الرّجالْ هْنا بْحالْ الجّـفـّافْ .. ف أُو روباّ ...!
*****************************************
الرّجالْ بْحالْ الجّفـّافْ : بقلم ..عبدالعزيز النـّضّـام ...
بروكسل.. السبت 04 ماي 2013 م !
*****************************************