خواطر
الحمد لله زماني ما بحالو زمان
رزقني الله خير العرسان
دازت صعاب وحرب ومقاومة الطغيان
داز وباء و مرض وقلة الكتان
لكن عمري ماعرفت معاه الحرمان
وفالاسواق يتخير لي غير المزيان
يدافع على الحق بلا كثمان
متبع كتاب الله والفرقان
حقيقةً هو سريع القلق وغضبان
لكن دايما يعاملني باحسان
ما نتسب ما نتهان
واهداني المولى الصبر في الوان
ووفرت ليه راحة النفس و الدفئ والحنان
اشحال ترجيت الرحمان
ذرية صالحة مع زين الشبان
سيدي محمد بن عبد الرحمان
في صغري دازت عليا
فقدت واحد الغزالة من بنيا
عزيزة على اباها وعليا
كان عندها 5 او 6 هيا
ملي يجي اباها فالعشيا
يعلمها شي حروف فالكتابة والقرايا
شي مرات يحفظها آيا بآيا
كانت مع ولادهم يلعبو فسطاح الدويريا
كنت نصبن وسط الدار رماوها ليا
نزلات الحبيبة قدام عينيا
بلا حركة هامدا مرميا
تصدمت ما بكيت ما نزلو ليا
الله آ ربي ما ندمع ما يخرجو ليا
حمدت الله اللي عطاها ليا
ونحمد الله اللي اخداها هديا
رجعت للعالي يبين الحق فيهم ليا
يقول لي اباها عمري قلبك بذكرالله الوليا
يتذكرها مسكين ويجبد وريقة كاتباها هيا
يتنهد : مليكا فباب الجنة تسناك معايا!
تصدمت ما بكيت ما نزلو ليا
الله آ ربي ما ندمع ما يخرجو ليا
مات ابا عليا
مشيت عزيت امي وعزات عليا
تصدمت ما بكيت ما نزلو ليا
الله آ ربي ما ندمع ما يخرجو ليا
ثقال همي مللى ابا بريك مات
مازال السنة مادارت
مازال القلب حامل اوجاع وآهات
مزال حتى عيني ما بكات
مازال الجرحة عميقة ما برات
تصدمت ما بكيت ما نزلو ليا
الله آ ربي ما ندمع ما يخرجو ليا
كتمو عليا موت الحنينة الحبيبا
مللي انا ياالله نفيسة معذبا
لكن نفسي ضاقت وحسات بالضربا
مللي شفت حدايا الوجوه مقلبا
ومللي ما جاني فهاد المناسبا
لا امي الطاهرة لا بابا
قلت ليهم غير قولو الحق دابا
تما ما بقاو طولو عليا في اللعبا
واساوني و صبروني على امي و ابا
تصدمت ما بكيت ما نزلو ليا
الله آ ربي ما ندمع ما يخرجو ليا
هنا صدماتني اعنف الخبارات
على اميمتي خير الامات
قالو ربما بالفقصة مات
وربما الله طلبات
ما تلذذ من ورا رفيقها حيات
احمدت الله على ما خلى وما خلات
انا كنت احسن وحدا ورثات
رجال فالكتاف واخوات
تصدمت ما بكيت ما نزلو ليا
الله آ ربي ما ندمع ما يخرجو ليا
تمنيت يرزق الله لبنياتي اخوان
واحد المرا تحقق حلمي وهكدا كان
ازدادعندي في الصبح غزال من الغزلان
صبي اجمل وارق الصبيان
هزاتني الفرحة هزان
نور وجهو عطاني امل وامان
تمنيتو لبّاه سبب في الراحة و الاطمئنان
تمنيتو لاخواتاتو سد على قهر الزمان
تمنيت يكون فكتافهم ضد العديان
لكن الفرحة دامت يوم ماوصلت يومان
ودعني صغيري فالعصر مع الاذان
بقا لي غير سريرو فارغ و عريان
بقا لي غيرحليبو من صدري هواد جريان
آه ...! والدمع لو ساعفني لوكان
عمرت به انهار و وديان
بقات لي غير صورتو في الاذهان
بقات لي غير صرختو في الآذان
حتى قبرو ماعرفتو وعليا تلفان
حلم نهار بقالي مدة وزمان
وخا صبرني عليه اعز انسان
وخا عندي اقوى الايمان
مازال جرحو فيا لحد الآن
تصدمت ما بكيت ما نزلو ليا
الله آ ربي ما ندمع ما يخرجو ليا
دارت الايام بقاو اخوتي انسابو
هما رفاقو هما صحابو
كل جمعة يدقو بابو
ما تحلى الصينيا الى ما عليها نيابو
ونيابهم بالحديث تقرقبو
نختصر ماعليناش يديو ويجيبو
بابا ووالمحجوب مشاو صغار دغيا غابو
اختي خدوج مسكينة ورّاها الزمان عذابو
ما توخر ليها غير هاد البيت وطوبو
بناتي على الاولاد اللي ما عرفات نابو
هكا شجرتي كاع عروشها دابو
نطلب لله ليهم جميع مغفرتو وثوابو
تصدمت ما بكيت ما نزلو ليا
الله آ ربي ما ندمع ما يخرجو ليا
دار الزمان الغدار
ورجع الموت لعندي للدار
واستى زين الرجال من يدي واختار
نطلب منك يا الواحد القهار
تعوضو باحسن من هاد الدار
وتغفرلي وليه يا رحمان يا غفار
تصدمت ما بكيت ما نزلو ليا
الله آ ربي ما ندمع ما يخرجو ليا
الصبارة والدتي
بقلم البارة جميلة جبوري
16/05/2013
