جَغْمَاتْ ف حلق الارض ...
هَرْبُو النجومْ
هربَتْ الكَمرَة
بقَاتْ الشوفة وسطْ السُّؤالْ ...؟
...
بقيتْ متكِّ على ودني
ك نسمع حَسْ الشْتا
وهي كتشربْ السراب فعزْ لهيبُو
جغمات فحلق الارض يطيبو
...
الجغمة الاولى
شمّيتْ ريحة الترابْ
فصدرْ الارضْ
عصْرَتْها السما
حتى احْمارُو حنوكْها
عاد فتحَاتْ الباب
لعروق الورد
تقبّلْ الحياةْ
...
الجغمة الثانية
براو شقوق الارضْ
كان اليابْسْ
حاسْ بالموتْ
وصلاتْ لحلْقُه
كان ناعس
ملِّي فاق
لقاه فات الفوتْ
...
الجغمة الثالثة
توضَّاتْ شحال من شجرة
من العْكَرْ
ياك القطْرة جاتْ تبشَّرْ
بولادة جديدة
كتْطوَّلْ العْمَرْ
الجُّغْمة الرَّابعة
كانت اكْبرْ
زادْ الصوت ف الجَّرْ
حيت واحد من الوِدانْ جْعَرْ
كْفَ همُّو على الحملة
تْخوضْ الصفا ف الما
جَرْ العين من شْعَرها
حتّى بْكاتْ
...
الجُّغمة الخامسة
فاضتْ الخْواطرْ
الخوف جَا يَتْقاطرْ
للدواخل
من داخلْ
دازْ مع الريق
تمّاكْ احْصلْ
الجغمة الساتَّة
بحالْ العسلْ ف اللّدّة
بحال البسمة
الخارجة من الشوق
بحال والو
تكوني انت
الاولى ف الشروق
حيتْ الشْتا
رَشّاتْ
حلفات
ما تباتْ في فم الواد
طلقات رموش السما
ديكْ الحلمة البايتة
كول تحقٌقات
...
عبدالعالي الوالي
