مَا طَقْتْ لْوَحْشَة عْ لَهْجَــرْ
مَا سَاعْنِيشْ مْكَانِــــــــــــي
طَابْ لْقَلْبْ و ضَاقْ الصْدَرْ
سرْحَتْنِي لْمَخْفِيٌَــــــــــــــة
وُقْفَتْ بِي لْخَطْوَة عَندْ لبْحَرْ
وُ الدَّمعَة فْ عْيَانِـــــــــــي
عَنْد موَاجُو سَاقْنِي لقْــــــدَرْ
وُ لْهَمْ عَامْ علِيَّــــــــــــــــا
لُونْ غْمَامُه صَادْم يَنْشَـــــرْ
جَنْحْ الظْلَامْ غَطَّانِــــــــــي
مْنْ فَرْطْ لْحُرْقَة دْ لْمَنْظَــرْ
جَرْ سْرَارْ قْوِيَّـــــــــــــــة
شَابْ لُخَاطْرْ فِيكْ يَا لْبْحَرْ
حَارْتْ فِيكْ لَمْعَانِـــــــــــي
شَوْقْ لمُوجْ يْعَانْقْ الصْخَرْ
صَرْتِ أَرْضْ مَخْلِيَّــــــــة
سَقْتْ عْلِيكْ الرُّوحْ يَا لَبْحَرْ
سَقْتْ عْلِيكْ حْزَانــــــــــــي
جِيتْ نْعِيدْ مَا طَالْ بْ لَقْهَرْ
جْبَرْتْ صْفَاحْك مَطْوِيَّـــــة
صَيفْكْ مَالْ وُ خْرِيفْكْ يَزْفَرْ
رِيحْكْ هَزْ غْصَانِــــــــــــي
للدَّمْعَة مَا صَبْت شْفَـــــــــرْ
نْدَارِي حَرْ لْبلِيَّــــــــــــــــة
فِينْ الشَّمْسْ الضَّاوْيَة تَحْضَرْ
تْنَوَّرْ فِيكْ لْرْكَانِـــــــــــــــي
فِينْ نْجُمُومَكْ فِينْ لَقْمَــــــــرْ
فِينْ غْرُوبْ لْعَشْوِيَّــــــــــة
فِينْ احْلَامْ و قْصُورْ الصْغُرْ
فِيكْ رْسَاتْ الأَمَانِـــــــــــي
سَالْ رْمَالْكْ لَوْ تَهْضَــــــــرْ
تْرْخِي حْرُوفْ لْقْصِيَّــــــــة
فِينْ عْيُونْ جْفَاتْ يَا دْ الصْبَرْ
حَرْ الشُوقْ بَكَّانِــــــــــــــــي
فِينْ وجُوه عْطَاتْ بْ الظهَرْ
يُومْ حْمَاتْ لَحْمِيَّـــــــــــــــة
هَانْ عْلِيَّا هَمِّي يَا لَبْحَـــــــرْ
كِ شَفْتكْ وحْدَانِـــــــــــــــــي
حَالْكْ شَقْنِي وُ انْتَ جْـــــــدَرْ
تْكْفِي هَمَّكْ عْلِيَّــــــــــــــــــا