[size=37] [/size] لْمُوجةْ أُطِّيرْ فَ سّْما نَغْمةْ
ـ1ـ
عباسْ ولدْ لَفْقيهْ بوراسْ
فْ خُوتُو دْكورا لْخامسْ
قْرا فَ جَّامع مْعَ بَّاهْ كِ نَّاسْ
فْ عِشرينْ عامْ صَرّْدُو لْمكناسْ
ـ2ـ
إِقلَّبْ عْل لْخدمةْ أُيَتَّوا مْع لْعمَّةْ
حْليمةْ عَمّْتُو مُولاةْ لْحَكمةْ
قالتْ لُه: لْقَشلةْ وَلاَ كَلْمةْ
عباسْ دْرِيوَشْ رْضى بَلْقسمةْ
ـ3ـ
مْشى لْعسكرْ ما فيها باسْ
تْخرَّجْ مْخزّْني أُتْعيَّنْ فَّاسْ
بعْد عاميَنْ تْحوَّلْ لْوَلْماسْ
تْزوَّجْ بْ شَلْحةْ تاجْ رَّاسْ
ـ4ـ
رَبْعينْ عامْ تَجْوالْ أُخدْمةْ
لَبْلادْ فْ راسُو ولَّتْ مرْسومةْ
نْهى سَرْبِيسُه بْلا عِيبْ بْلا خْصومةْ
صفْحةْ بِيضةْ بَ نْقا مخْتومةْ
ـ5ـ
ما ضْربْ حَسبةْ لْتمَّارةْ أُتْكرْفيسْ
دِيما يَضْحكْ ما يْغوْبشْ ما يَعْبسْ
قَناعْتُو بُنيانْ صْحيحْ سَّاسْ
نُقلةْ طيِّبةْ أُرَّحْمةْ عْل لْغرَّاسْ
ـ6ـ
ما طْلعْ كْرادْ ما رْبحْ أَوْسمةْ
ما تْسابقْ عْل مِنحةْ وَلاَ كْريمةْ
ما بْنى فِيلاَّ ما دَرْ فِيرْمةْ
ما عَلاَّ حْيوطْ مَنْ يَجورْ أُسِيمةْ
ـ7ـ
خَلّفْ وَلدْ سمّاهْ إلْياسْ
جُندي ضابطْ فَ صَّحْرا حارسْ
مْخالفْ بَّاه كَيجْتهدْ أُيتْنافسْ
درْبُه مدْروسْ ما يَتردَّدْ ما يَحْبسْ
ـ8ـ
مْع مُوتْ مْراتُو دارتْ بِه لْغُمّةْ
حَسّْ بَ لْوَحدةْ لِّي ما تَتْسمَّا
أُحْياتُو تنْقصْ معْنى أُقِيمةْ
أُبزَّرْبةْ عَقْ أُمطوَّلْ تخْمِيمةْ
ـ9ـ
حِينْ تْقاعدْ بعْد عامْ عْبرْ أُقاسْ
حزَّمْ قْلوعُو راجعْ لْزِينْةْ لَعْرايسْ
طنجةْ بْلادُو فْ قلْبُه مغْروسْ
قرَّرْ أُحْسمْ أُوْضعْ حَدّْ لَتْوسوِيسْ
ـ10ـ
وْصلْ أُتْلاقى خُوتُو أُصْحابْ لْقُدامى
قلَّبْ عْل لْجِيرانْ أُناسْ لْحُومةْ
تْفكّرْ ايَّامْ زْمانْ كِ لَحْلامةْ
!أُلِّي تْبدّلْ ما تنْفعْ عْلِيه انْدامة
ـ11ـ
خُوتو بَ لْبِيعْ أُشْرا دَرُوا لَباسْ
أُهو ما شطْنُو دْهبْ وَلاَ نْحاسْ
شَارُوا عْلِيه بْ دارْ لْمَرحومْ بُوراس
مصْلوحةْ دايْرِينْ عْلِيها عسَّاسْ
ـ12ـ
عباسْ رْجعْ لْدارْهم بْألفْ سْلامةْ
فْ حُومْة لْوادْ مفْروزةْ مرْشومةْ
دارْ كْبيرةْ ظْهْرجَّامعْ مَعْلمةْ
فَ زْمانْ بَّاه كانتْ قِبلةْ لِلعُلما
ـ13ـ
حُبّْ لَبحرْ كانْ راقدْ محبوسْ
أُصْيادةْ بْليةْ تنْخسْ فيه نْخِيسْ
فْ لِيلةْ واحدةْ فْ دارْهم تهَّوسْ
شْعلْ عْوافي ما تهْمدْ ما تْكايسْ
ـ14ـ
فَ صْباحْ فْ أوَّلْ طلَّةْ أُنسْمةْ
دازْ شْرا لْقصبةْ أُلعُدَّةْ أُلحزْمةْ
أُلخطْوةْ تَّاليةْ مدروسةْ محسومةْ
مَرْقالةْ "أُزْهاني" حجْرةْ معلومةْ
ـ15ـ
ما حدَّو قادرْ يمْشي فَ دَّارْ ما يكْلسْ
ما عنْدُه ما يْدِرْ بْ شي وْجوه نَّحْسْ
لَبحرْ حْسنْ مَ لْما مْعكَّرْ أُمْغيَّسْ
!أُمعْدنْ نَّاسْ فيه رْخيصْ أُنْفيسْ
ـ16ـ
لْقصبةْ حْسنْ مَ لْقهوةْ أُضَّامةْ
أُتْقرْقيبْ نَّابْ غِيبةْ أُنمِيمةْ
مْع قُومْ لْسانْهم سْيُوفا مسْمومةْ
فَ رْيوسْ لَعْبادْ تزْدحْ بْلا رحمةْ
ـ17ـ
عباسْ ما يْجمَّعْ ما يْحنْززْ ما يْقوَّسْ
أُما يَسرحْ بْ ودنُو يتْصنَّتْ أُيتْجسَّسْ
فْ لَخْوا ما يزعْ ما يحصدْ أُما يدرسْ
فْ لَخْواضْ ما يْسِيسْ أُما يْغمَّسْ
ـ18ـ
إيمانُو أُتربيتُه لْجامْ أُصْريمةْ
حْصانةْ مَنْ كلّْ حاجةْ مْحرمَّةْ
ولا شي شُبْهةْ مْعفنَّةْ زْهِيمةْ
طامعْ فْ موتةْ مستورةْ محتومةْ
ـ19ـ
أُيْودَّعْ دُّنيا مرْضيّ أُما متْعوسْ
غانمْ رْضى مُولاهْ أُما مْفلَّسْ
كْريمْ أُشْريفْ نْظيفْ أُما مْدنَّسْ
غالبْ غْوا أُضعفْ نَّفسْ
ـ20ـ
طالبْ صحَّةْ أُعافيَّةْ امْداوْمةْ
حتَّ ياخُذْ اللهْ أمانْتُو أُدَّاتْ سَلِيمةْ
بْلا ما يْوخَّرْ عْل قْريبْ ولا خدَّامةْ
يتْمنَّى أُسَّاعةْ عَنْد اللهْ محكومةْ
ـ21ـ
صْيادةْ عَنْدُه أَعْرافْ أُطُقوسْ
بْغى ينْهي ايَّامُو رايَسْ
يتْمتَّعْ بْ لَبحرْ، لَهْوا أُشَّمسْ
أُعْل لْقنْطةْ إشدّْ لْبابْ أُتْنافسْ
ـ22ـ
اخْتارْ راحْتُو ب قَناعةْ أُعزيمةْ
يجْعلْ مَ لْمُوجةْ رفيقةْ حميمةْ
تْنسِّيهْ صْداعْ دُّنيا لْمهمومةْ
أُناسْها تَّالْفةْ، مسعورةْ محمومةْ
ـ23ـ
لَبحرْ كْتابْ أُدرسْ بْلا مُدرِّسْ
لُغْتُه عالميةْ، صمْتْ أُهمْسْ
بْها أُهْنا ما يخْفى، ملموسْ
خِيرْ عْمِيمْ أُلْجاحدْ مطْموسْ
ـ24ـ
لْمُوجةْ أُطِّيرْ فَ سّْما نَغْمةْ
تَطْربْ أُدَّاوي لْحُرقةْ أُصَّدْمةْ
نَغمةْ ما تْخلِّي فَ لْقلبْ ظَلْمةْ
ولا فَ لْبالْ ضْبابةْ مْخيّْمةْ
ـ25ـ
عباسْ ما بُهالي ما مْوالي ما مقْيوسْ
لبَّى نِدا حُبُّو بْلا ما يْراوغْ أُيْعكَّسْ
اخْتارْ ما خالفْ سُنَّةْ ولا ناموسْ
تْوكَّلْ بْدا مِشوارْ جْديدْ سرْبِيسْ
ـ26ـ
هكْدا عباسْ دِيما دِيما
بَكْري كِ لْبارحْ كِ لْيُوما
مْع خْيوطْ ضُّو تْبانْ فَ سّْما
إِشدّْ طْريقُه بْ جنْبْ لْما
ـ27ـ
فايقْ مْصحْصحْ، شابعْ نّْعاسْ
غادي ناشطْ، حاضي عسَّاسْ
مَشْيةْ خْفيفةْ، معبورةْ قْياسْ
بالَكْ يَزْلقْ ولاَّ يَعثرْ فَ لْيابسْ
ـ28ـ
عِينُو عْل شي رْيوسْ مْعلّْمةْ
شي تْقاصصْ ما مْعدّْبَه نِقْمةْ
كيْتجنَّبْ لْغاشي، تَّخْلاطْ أُزَّحمةْ
!شعارُه مَثْلةْ: فَ تِّساعْ رحْمة
ـ29ـ
لمَّا بْلغْ واحدْ رَّاسْ
حطّْ لْقُفةْ أُلقصبةْ بْ حَماسْ
قدّْ لْكُلسةْ يَلْتقطْ نْفاسْ
أُخْوا دْكِيكةْ قَهوةْ فَ لْكاسْ
ـ30ـ
طلَّعْ سْلاحُه، سبْسِي أُقْسِيمةْ
عمَّرْ شي شْقُوفةْ أُكْما
باشْ إِشوفْ آشْ تمَّا
عادْ ناضْ دْعا أُسمَّا
ـ31ـ
جْبَدْ لَمْراغةْ رفْسَها رْفِيسْ
سرْدينْ وافي فَ لْملحةْ مدْسوسْ
خلْطُّو بْ تَفزَّا أُجمْعُو فْ طاسْ
رشّْ رشةْ فَ لْما، تْأنَّى أُتحسَّسْ
ـ32ـ
عباسْ إِديرْ بَ لْمَثْلةْ أُلْحِكمةْ
شادّْ عَرْف لْوالةْ كِ لْحَرزْ أُلَعْزامةْ
!صْيادةْ بْلا مْراغةْ قَلَّةْ لَفْهامةْ
ولاَّ غِير مْلاغةْ مدمومةْ
ـ33ـ
لْبسْ كَسوةْ خَضْرا لَلْما تحْبسْ
طْلَقْ لْقصبةْ أُرْبطْ شَّعْرةْ أُقيَّسْ
ركَّبْ لْفرشِيَّةْ أُسْنانرْ فْرنسِيسْ
طعَّمْ أُدلَّى أُكْلسْ إِعسّْ
ـ34ـ
ما يْفضَّلْ غِير بِيلوطَةْ سردينْ طُعْمةْ
مْخلّْطةْ بَ سْميدةْ غْلِيظةْ أُمخْدومةْ
مْصوّْبةْ فَ دَّارْ مظْبوطةْ أُمْقوّْمةْ
ـ35ـ
عِينُو عْل لْفرشيَّةْ تغْمزْ ولاَّ تغْطسْ
مسْتنِّي صابرْ، متْفاءلْ ما ياءسْ
شي ضرْبةْ صْحيحةْ تفوَّجْ عْل نَّفسْ
شي بُوبْرادعْ لَلْقصبةْ إِقوَّسْ
ـ36ـ
شي كْحايْلةْ فاخْرةْ تْزنْزنْ ولاَّ حلاَّمةْ
يتْفتَّحْ بْ لِكتَّبْ بْلا امْساوْمةْ
كلّْ نْهارْ أُرزقُو، قَسْمةْ مقسومةْ
أُشُّكْر زْيادةْ فَ رِّزقْ أُلُّقْمةْ
ـ37ـ
مْع نَصّْ نْهارْ طلَّعْ زُوجْ شرْغوسْ
لْعاطي ما زالْ يعْطي أُلْخيرْ ما يْبسْ
أعباسْ ما طامعْ إِبِيعْ ولاَ يْحَوَّسْ
زادْ كْحايْلةْ جْمعْ لَحْصِيدةْ فْ كِيسْ
ـ38ـ
تْوضَّا أُصلَّى لْعصَرْ بْلا ما يَعْمى
أُصْلاَ موقوتةْ ما تْكونْ متْراكْمةْ
لمّْ حْوايْجُو أُفَ لْقُفَّةْ حطّْها مْنظّْمةْ
قْلَبْ راجعْ شاكرْ ربُّو كلّْ نِعمةْ
ـ39ـ
ما يحْتاجْ طاكْسي ولاَ طُوبِيسْ
طْريقْ قْريبةْ عْلِيها تْعوَّدْ أُتْمرَّسْ
دْقايقْ أُيوْصلْ بْلا ما يزْربْ ولاَّ يَعْفسْ
طْريقْ سهلةْ ما تْعيِّي أُما تْكرْفسْ
ـ40ـ
فَ لْغَرسةْ نزَّلْ لَحْملْ تحْتْ لْكرمةْ
دْخلْ لَدَّارْ ضْربْها بْ تَحمِيمةْ
باشْ يرْتاحْ أُيخْفافْ كِ لَحْمامةْ
دازْ لْكُوزِينةْ أُهِي لِيهْ مْسلّْمةْ
ـ41ـ
عَرْفْ طَّبْخْ فْ راسُو ما شي فَ لْكُرَّاسْ
مْعلَّمْ فَ شْهِيواتْ شَّمالْ أُسوسْ
طْواجنْ فَ حقّْها ما يْفرَّطْ ما يبْخسْ
أُدْكُوكْ لَمْسةْ فَ لْقِمَّةْ ما تنْداسْ
ـ42ـ
عدَّلْ طاجينْ شرْغو بَ لْخُضرةْ أُلِقامةْ
حطُّه عْل عافيةْ مْجهّْدةْ لازْمةْ
حتَّ يغْلِي أُيْبقْبقْ عادْ يخْصمْ منّْها خصْمةْ
أُخْرجْ لَلْغرسةْ يسْتنَّى أُيْعسّْ مَنْ تمَّةْ
ـ43ـ
كْما أُدكّْ أُطَّاجينْ قرْقرْ حتَّ خْرسْ
طابْ أُما زايدْ ملْحةْ أُما مسُّوسْ
بْردْ شْويَّا خْواهْ فْ طَبْسِيلْ طَّاوسْ
مْع جُّوعْ بْدا يْدقّْ عْليه نَّاقوسْ
ـ44ـ
حضَّرْ طَّابْلةْ بَ شْلادةْ خُضرةْ أُلْما
حطّْ عْشاهْ أُتفكَّرْ مْراتُو لْمرحومةْ
دْعا لْها بَ رَّحمةْ مَوْصولةْ تامَّةْ
شْكرْ أُطْلبْ مَ اللهْ حُسنْ لْخاتمةْ
ـ45ـ
صلَّى لَعْشا أُوجَّدْ فْراشُه ينْعسْ
أُركَّنْ لْمُوجةْ عْل إِذاعةْ طنجةْ يتْونَّسْ
مُوجةْ ثانيةْ فْ حُبّْها حاصلْ متْلبَّسْ
لْبرامجْها وفيّْ، مُدمنْ مْهوَّسْ
ـ46ـ
عاطِي اتِّقارْ لَجُّمعةْ، يومْ حُرمةْ
إِصلِّي أُيتْغدَّا مْع لْأُسْرةْ ملْمومةْ
فَ دْيُورْ لْخُوتْ بَ نُّوبةْ، عادةْ قايْمةْ
كَصْعةْ منْ كْسكْسو مْفضّْلةْ وَجْبةْ مْقدّْمةْ
ـ47ـ
عباسْ مْتبَّعْ مزيانْ حْوالْ طَّقسْ
عْل حالْ لَبحرْ أُيَّامُو مْعسَّسْ
أُفْ وقْتْ خايبْ إِبدَّلْ لْقصبةْ بْ فاسْ
فَ لْغرسةْ يسْقي أُينقِّي أُيغْرسْ
ـ48ـ
هدِي صفحةْ مَنْ حْياةْ بَ لْبساطةْ مبْصومةْ
مساراتْ أُخِيَّاراتْ واضْحةْ فْنارْ أُعَلامةْ
ما فيها حِساباتْ ولاَ اعْتباراتْ لِشُّهرةْ أُلْعَظمةْ
سْطورْ قْليلةْ أُكُرةْ عَندْ لْفاهمْ فَ لْمرمى!
ـــــــــــــــــــــــــــــــــــ
محي الدين أمهاوش
طنجة: دجنبر2013 
