أنَـــا وُانْـــتَ وَاحَـــــدْ

عدد الرسائل : 44 تاريخ التسجيل : 20/03/2014

صَنْعَـة وَحْـــــدَة أَنَا وُانْـــتَ
خْلَقْهَا بِـيدِيهْ مُــولْ الشَّــــانْ
اوْحَى لِيهَا وْكَانْتْ فْ الْحِينْ
بْدَعْهَا بْــحَكْمَــة وَالْإِتْــقَــانْ
*****
أنَـــا انْـــتَ وُانْــــتَ أَنَـــــا
وُخَـلِّي زُوجْ فْ خَــبَرْ كَـانْ
أَنَــا وَاحَـدْ وُانْــتَ وَاحَــــدْ
تْسَاوِي وَاحَــدْ بْـلاَ بُرْهَـانْ
وُالْحْسَابْ فْ عُرْفْ الْحُبّْ
مَاعَـنـْدُو قـِـيمَــة يَا إِنْـسَانْ
*****
أَنـَا رُوحَـكْ وُانْـتَ رُوحِـي
زَهْرَة وَحْدَة نَابْتَة فْ جْنَانْ
عْطَاتْ ثْمَارْ بِينْ الْعُـــشَّاقْ
وُفَاحْتْ عْطُورْهَا بَالرِّيحَانْ
خْـلِــيقَـة وَحْـدَة أَنـَا وُانْــتَ
مَتْسَاوْيِينْ فْ كَفّْ الْمِيزَانْ
آشْ فْـرَقـْنَا وُاحْـنَـا وَاحـَـدْ
حْتَّى فْ الْمُوتْ احْنَا جِيرَانْ
   *****
عْلَى عَوْدِي هَزِّيتْ احْمَالْ
مْهَاجَرْ بِيـكْ طـَالـَقْ لَعْـنَانْ
يِدِّي فِ يِدِّيكْ رَايْحِينْ بْعِيدْ
مَـتْسَابْقِـينْ كِيـفْ الصَّبْيَانْ
حَامْـلِينْ فْ قْـلُوبْنَا لَمْحَـبَّة
لْكُـلْ عَاشْقْ هَـايـِمْ وَلْهَـانْ
وُفِ يدِيـنَـا خْـيـُوطْ حْـرِيرْ
مَسْكْ وَعَنْبَرْعُودْ وُرِيحَانْ
وُنُورْ الْبَسْمَـة فْ عِـينِـينَا
ضَوَّى عْلِينَا دَرْبْ التِّيهَانْ
تْمَـنِّيتْ ارْوَاحْنَا تَـتْوَحَّـــدْ
وُدُّوبْ فْ اعْمَاقْنَا وُالْوَجْدَانْ

*****

      نَادَانِي مَلاَكْ فْ عَزّْ النُّـومْ
يَا الْغـَافـَـلْ لْعَـنْ الشِّيطَـانْ
رَاه الْحُـبّْ فْ جْنَانْ الْخُلْدْ
خِيـرْ وُجـَمَالْ كـْبِيرْ الشَّانْ
هُوَ وُانْتْ فْ الْـوَجْدْ تْــوَامْ
جُودْ وُعَفَّـة مَا طَـالْ زْمَانْ