الْمسْكِينْ وقلة الجهد والحيلة
آجيوْا نَديوا و نجيبوا ف لكلام
نبداوها بالصلاة و السلام ع الحبيب
الكلام ع المسكين و حياة التخمام
قلة الجهد و الزمان صعيب
الجناح مهرس
و قلة الحيلة
ف الحياة مكرفص
و النظرة ذليلة
عرام من لهموم
و فقير ف الدم
ف ضاية الحگرة يعوم
يسرطها بالريق و السم
* * * *
عَند النفوس تلقاه محگور
طالب السماحة والقلب مألم
محاين الدنيا خلاتو مقهور
حامد الله وعيش مْسَلَّمْ
صابر والصبر قالوا دواه
ربي على العباد يشوف
سعدات اللي من خيرو رْوَاهْ
عرف مقامو وتبث لحروف
* * * *
بالجوع و الحگرة مضرور
ف الزمان الگارح مازال يتعلم
و هي دنيا إما جار و لا مجرور
و قليل الجهد ما يدوي ما يتكلم
و صابر و الحگرة تحوم ف سماه
الزمان دابحه بسيوف
و شكون يحس و يخفف بلاه
يخلي لحبل على عنقه مرخوف
* * * *
خرجت من عرصة لكلام
ودخلت نقرى على المسكين السلام
في الليل يبات يحلم
ويفك في لحلام
وفي ليام هاز حملو عَلْ الدوام
* * * *
لعفه وُ لمرُوّه على راسو تاج
ما يتدلل ما يتعلل ولو يكون محتاج
نفس قويه راس لمالي
صبر سلاح يكَاوي لحالي
قلب كبير راضي بحكم لعالي
لمسكين ما هُو مسكين الجيب
لمسكين مسكين النفس وُ لقلِيبْ
* * * *
تشتت كلامي طول
وعرض يمين وشمال
لا تنوحي يا نايحة
المسكين الداتو الجايحة
وحنا نحيحو حيحة على حيحة
اكبر الغوت
وتولي الواقفة قل من الطايحة
عاد يمكن صيحة المقهور تتسمى صايحة
* * * *
المسكين لامَنْ إسال عليه مسكين
بين دروب القهرة مضروب
يومو ما يومْ ب همو إنينْ
لاحالة كيف حالتو معطوبْ
إقاصي ما كفى ويثعبْ سنينْ
حقو بين الغيرْ مهضوم ورْجاهْ مسلوب
* * * *
لامن يرعاه لا قلب حنين
مشتت بالو ورمياه لعتوب
و هايم محوج مابين وبين
مذموم وعلى أمرو مغلوب
والسعد مكفس وما كاين عوين
وجهدو مقاضي مكثف ومصلوب
منهور وفانياه العلة
ف شتا وصيف قارصاه الكية
وُ لَكْفن واجد لموت الغفلة
و مدلفق والكسرة حرفية
واكل عزاه ولا عيش حْلا
محوّج ف عيدو والكبدة مشوية
عاش ما كسب مات ما خلّى
لا دار لا جّدار لا قسمية
* * * *
البسمة والقلب مسرور
صابر واليد في يد الناس
سول الهاني تلقاه مضرور
عند المسكين ما تلقى باس
----------------------
10 شتنبر 2009 /جامعة المبدعين المغاربة
المبدعـــون :
* علي مفتاح
* ياسين مصطفى جميل
* حميد يوسفي
* نجيب أمين
* ربيع عامر الغيواني
* البوعليوي عبد السلام
* عبقور عبد الغني