نجيب أمين
زجال مشارك في ديوان"عرصة لكلام"
عدد الرسائل : 655
تاريخ التسجيل : 28/07/2009
 | | موضوع: نص ( المؤسسة) من ديوان المعطي للزجال المقتدر رضوان أفندي السبت أكتوبر 03, 2009 6:46 pm | |
| ديوان المعطي
للزجال المغربي المقتدر الأستاذ رضوان أفندي
الطبعة الأولى أبريل 1997
الديوان من حجم 14.5 على21.5 يضم 55 صفحة وخمسة عشر نصا زجليا على الترتيب التالي
1 - فرحة المعطي .
2 - أطلس النزاهة .
3 - إفريقيا لكبيرة .
4 - الهجرة .
5 - منامة المعطي .
6 - صاروخ في الذاكرة .
7 - الورثة .
8 - ما زال شمعي يكدي .
9 - المؤسسة .
10 - مرشح شح .
11 - المعطي والطلبة .
12 - الجفاف .
13 - المعطي ليطرانجي .
14 - لكَنازة .
15 - سياسة لقبيلة .
اخترت لكم نص المؤسسة وهو النص التاسع كان لي شرف حضور قراءته من طرف الزجال رضوان أفندي في المهرجان الوطني للزجل للشباب الذي نظمته الرابطة المغربية للزجل بمدينة اليوسفية المناضلة 26/27 غشت 2007
المؤسسة
رزقنا الله لكياسة
ونعمة المؤسسة
وجانا لفرح المزور
بالمايه وياليل ياعين
بثقلو نزل يتكور
على رقص مقص التدشين
واللي حسبناه مقدر
وحلمنا غدا يطلع زين
يبقى ف الغيب يتجرحر
وغدا يبقى بين وبين
والغطاس ولد الغطاسة
يغرق ف بحر المؤسسه
تفرق القوم ف سلوم
لتحت بحر و لفوق نجوم
زحام لتحت مقبره
للي ما يعرفش يعوم
جنان لفوق شكارة
منفوخة ف كرش لمتخوم
و يسبق عمي ونسيبي
ولد لقبيلة وحبيبي
والمعلومة للمعلوم
ونصيبك ونصيبي
بشرع لغابة مقسوم
تّمس لفرح تعاسة
طلع كحل من بوكاسا
اللي صحيح مرص ف الصف
واللي مريض يموت واقف
واللي تفكر يتناسى
واللي بدل وخالف
يتشاع ويستانف
السخون دواه يتكلاصا
بنفسو الخوف طلع طلع خايف
والأمان من لخرايف
والناس نجرهم كراسى
منشار المؤسسه
لسلف مؤسسه
العلف مؤسسه
الصف مؤسسه
مؤسسة ف الزنقه...ومؤسسه ف الدار
ضحك بأوامر .....وتنفس بمقدار
ونعس بقوانين ...وحلم بلا أسرار
المحبة بالحساب
والزريبة للكساب
والزنزانة للتعمار
وحق عليك تفرح
يمكن حتى تشطح
وما عندك ماتختار
واللي عاش أكبر من الهم
يموت أصغر من درهم
واللي ختارو لمقدم
ما يكبر يصغار
طاح الدم نقطة ف سروال العار
وراحت القطة عروسة للفار
والزغراتة والعراسه
شراهم صندوق المؤسسة
على ضو القنديل
خارج المؤسسة
طاح ف لمدينه الليل
كونطوار وعساسة
ودخلت الرهيبة بورديل
وشعشع لخمر ف الطاسه
غرق الدماغ ف الكاس
طلعت الضبابة للراس
ف المخ فلقة
ف لقلب مشنقه
شحال خصني من وقت
باش نقدر ننساه
الحلم اللي الصمت
طواني وطواه
مازال يعاند
باقي يتوالد
ويفرح بلاه
يصارع بحرو يعاكس مجراه
صعاب عليه يحفى موس ف جواه
أو يدوب ضواسا ف كناش المؤسسة
| |
|
