حكايتي مع مراتي
حكايتي مع مراتي حكاية
كانت زينة ما محتاجة عكر ما محتاجة مراية
ماشية بالنية و بالغة الغاية
بغيت معاها يتحقق رجاية
دار الزمان و دارت الايام و هبطت مراتي الراية
سارت على لولاد و التوحام و قالت لي برك حدايا
خافتني لنطير مع لحمام او ما نعطيها عناية
هذي قصتي مع لغرام بغيت نخلّيها لكم رواية
كانت مراتي طيبة و حنينة
تلبس لي القفطان و الدفينة
صباح و عشية في الكوزينة
كل نهار شهيوات بنينة
طايبة على الجمر و زوينة
ديما ضاحكة و ناشطة و ما هي حزينة
تزادوا عندي بنات او ولاد
ايو خرجت لي لمرا بالمرصاد
بغات تلبس لي بحال بنات لبلاد
الصاية و البوضي او لاحت لحجاب
وضرت الكوزينة او سدّت الباب
لا ماكلة بنينة و لا طياب
و شكون اليوم يحن فينا يا لحباب
مشات لمسيكينة او خلاّت لينا لعذاب
كل نهار نجي و نجيب
هذا ثمر هذا لوز و ذاك زبيب
علاه؟شكون عندي غيرها حبيب؟
الغيرة قتلتها كل يوم في الليل تفتّش في الجيب
مراتي كبرت و هترت و مشى لها اللبيب
عند الباب واقفة لي بحال الا عامل مصايب
فين تعطّلتي و علاش ولّيتي كتغيب؟
النهار راح و الشمس قربت من لغريب؟
كل يوم عند الشوافة صباح و عشية
قالت لها راجلك شادّاه مرا ماشي درّية
عاملة لو سحور مدفون في الروضة لمنسية
قالت لها ها عار ربي الى ما وصفيها ليّا
راسها بين كثافها او عينيها غارقة مخفية
شوفتها ماضية تجفف الماء من المطفية
لاصقة فيه و عليه ملوية
ما تحن ما ترحم كيف الحية
ما نقول ليك غليظة ما نقول طبوزية
وا ردّي بالك راكي متبوعة او بعينيها محضية
ايوا جبدي لفتوح لتعودي حتّى نتي ضحية
يا لمرا راه حشومة عليك و عار
راني غي تايه خدّام باش نجيب فاكية و ثمار
و شكون عندي غيرك يا عمارة هذه الدّار
فيك الآمر فيك المأمور او فيك الكومندار
راه ما عندي حد غيرك ياخد لي بالشوار
فلوسك كلّها ضاعت بين الشوافة و العطّار
رجعي لأصلك ، القفطان و الدفينة و الشمار
حلّي الكوزينة او شوفي الى ناقصها ديسير او خضار
و تحزمي و كرزي لحزام راه الا ما كان القفّال مكروز ما يطلع لفّار
رحال أودغوغ
