ذيك الشمس لي في غربات
قلت نفهم راسي ...قبل ما يفَهْمونِي .شحال يقد جريد النوالة ما يعطي ظهره للشمس؟
شحال يقد النادر ما يراوغ الريح ؟ شحال يقد الزكروم ما يتخبى على الصدا ؟ شحال يقدني و يقدك باش تفيق ؟ الشتا الا طاحت سعدات الارض بها ،و الا زادت طاحت، مطمورتك العامرة غير خويها .فهم على قد الشوفة... لحروف لمخبية بين السطور دوزها مع الرحى .
طحن لفهامة زيتون... و غَمَّسْ ف جهالتك .ف طبك الظلمة نكي لسانك حرف بحرف.
جر وذنك لفمك و زغرت فيها .بابا عيشور ما بقات تشبعه قديدة ،نشر حروفك ع لحبل
خلي لمعاني كُرْداسْ و شكون يلقم فيك يا باداس؟
غير لي سنانه منشار .قلت نلم البنة بين ضراسي ،قلت نزم و نبقى تمة ،مدهي نندب بشقوف كاسي . قلت الحرف نلبسه طربوش حمر... ما يشطح ما يهز بوطه
و الجلابة البيضا عربون لذيك ليام لي دازت .حلوة و لا حارة ...راها دازت.
سد فمك ،و سد على حرفك فيه ...و قول :راها دازت... حلوة و لا حارة ،راها دازت.
الليف... كنس قصيف
ما يتوقد ما ينقط
الا هاج يولي سيف
يفك تخباله و يربط
اللام ...لامة
علام بلونه حمر
يمكن يكون حمامة
و لا ديب بضفار نسر
الميم... زعيم
يدخل و يحضي سوق الهضرة
عايم بحره ...يتيم
بايزار و قبة خضرا
الغين... غمة
راكبني ف لخلاص
نودي من دمي حمَّى
مريض و وزنه نقاص
الرَّا ...مرايا
عقدة ف رباط الخيل
يزعرط ،ينقز حدايا
يقمع سكاتي و دمي سايل
البا ...كلبة
معرية لحمها للبراني
هذه حكة ،هذه جربة
ترابها ما تهنى،ما هناني .