حكمة آش من الحكمة تعالى تشوف معانيها
إلى بْغيتِي فْ ولدْكْ تتْهلاّ
قول إيه أو كثّرْ من لاّ
صُوتُو عليكْ مايْتْعلّى
ما يْمْدْ لا يْدُّ ولا سلاّ
يْزرع لحياتُو وِياكلْ الغْلاّ
إيه ديما كاتْرشِّي وْالِّدير لْعْلاّ
وِعيشْ حياتُو كايْ تفلاّ حروف وصوت
-------------------------------
كٌّالُوا سْيادْنا اللْوَالاَ
اللِّي فاتْكْ بْلِيلة،فاتْكْ بْحِيلَة
إلهام زادتْ
كايْنْ بْنادْمْ اللِّي فاتْكْ بْ آلْفْ لِيلَة أُو لِيلة
أمَّا الحِيلة كَ الدُّوزْ عْلى عينُو صْحِيحة أُو طْويلَة
الناس تْجْري ف حَرْ الزْمانْ أو هو كَيْقَلَّبْ عَلْ الظْلِيلة
-------------------------------------
كل واحد فينا أو باشْ موَلّفْ
كاين اللِّي لقى النميمة فاشْ إيتلّفْ
كاين اللِّي فاتْ جهدو وِيْ تكلّفْ
كاينْ اللِّي بْ الشِّيكِي ديما مغلّفْ
كاينْ اللِّي ناعس هانِي وِقيّلْ يْتْسلّفْ
والمعقولْ والدغرِي الزمان فيه محلّفْ
------------------------------------------------
خفتْ على راسِي من الرِّيح أو غطِّيتُو
ماجْبْتهاشْ فْ راسِي ولا سطِّيتُو
الدِّيتْها فْ راسِي أو من الخوى حضيتُو
هزِّيتْ بْراسي..درتْ لو النفسْ أو علِّيتُو
خفتْ على راسي أو بْ الخوف نجِّيتُو
-----------------------------------------------
ضحكتْ مزيانْوْ الضحكْ تَلَّفْنِي
ملِّي عرفْ نقطة ضُعفِي قالِّي سلَّفْنِي
بْناقْصْ من الضحكة إلى كانتْ جِيبِي تْكَلَّفنِي
------------------------------------------------
الخوخْ كلُّو دوا واخّا راسُو مثقوبْ
ماتْشُوفْ الجوا ولا الراس المغلُوبْ
ما تْبَعْ لْخوا وْترْمِي لسانكْ فْ الدنُوبْ
العقل زينْ واخّا الراسْ عامر حْبُوبْ
-------------------------------------------------
دارْ لْ الناس عْراضَة حْسْنْ مْنْ دارُو
باشْ يْفْقَصْ وِيْقْلِي السم لْ جارُو
أوهو فْ الدْيُوناتْ ماجابْ حدْ خْبارُو
مْرَاتُو تْعْثْرْ فْ التَكْشِيطة بْ مليون
وْلْدُو غادِي وِهْزْ سْرْوالُو كِ المجنُونْ
الحَلاقَة فْ وْدْنُو أو مْعَلَّقْ لْهايْتْ عَصر الفنون
شَعْرُو ي ْخَنْزْرْ فيكْ، خارج عل المضمون
وْ المَعْرُوضِينْ فْ التْبَرْكْيكْ يْغَنِّيوْا الملحُونْ
شرح
لْهَّايْتْ عصْر الفُنونْ
يقْصِدُ بِها البُّورْطابْلْ
وَ اللَّهَّايَة أَوْ السْكَّاتَة…. دْيالْ الدْرارِي الصغارْ
-------------------------------------------------
باعوا الدَّارْ الواسْعة والْمنقُوشة القْدِيمة
أو سْكْنُوا فْ صندوقْ من الصنادق الزِينة
دْكْوا وْتَادْهُمْ فْ قْفْزْ بْعِيدْ أو هجْرُوا الخِيمة
خْتارُوا شارع واسع باشْ إيبَانُوا وسط المدِينة
لاحُوا أصْلْ بَّاهُمْ أو شَبْعُوا مْنْ بْزُّولة المِّيمة
شْراوْا النْصارى الرِّياضْ أو فْ آثاراتْنا التَّرْزِينا
----------------------------------------------------
يْكْذبْ عليكْ الكذّابْ
اللِّي يْتْظاهْرْ بالفرحة الدّايمة
اللِّي بيّنْ سماهْ صافية ماهي غايْمة
يكذبْ عليكْ الكذّابْ
اللِّي زوَّقْ عِينُو…أو هيّ فْ الدموعْ عايمة
اللِّي قولْ مرتاحْ…وْ جفانُوا ماهي نايْمة
اللي يْضحك عل الحب…وْ روحو عل الغرام صايمة
يكذْبْ عليكْ الكذّاب
اللِّي قول شبعان…أو نفسو عل الخبزة حايْمة
-----------------------------------------------------
مالك يا لسانِي هاز الهضرة تْكمّشْ وْ تدْرْسْ
والمنَمَّمْ تابعكْ يلحس أو بلسانُو فيها يْغرسْ
ي حصدْها جيعانْ الإيمانْ أو فيها يْقيّلْ يْفْرسْ
-----------------------------------------------------
إلى مشاتْ حتّى كثْرتْ عليكْ الفهامة
الطيّحْ سوالف الليل بْ نهار عل الغمامة
وِ بْداوْا كشاكْشْ الغظبْ إنطْحُوا الزعامة
----------------------------------------------------
خلِّيكْ فْ هواكْ خلِّيكْ
دابا الوقتْ الدُّورْ وْتْورِّيكْ
اللي يْكرْهْكْ وْاللِّي يبْغِيكْ
---------------------------------------------------
غمَّسْتْ لسانِي فْ الكذُوبْ
بْشْدُوقا سايْلِينْ بكثرة الذنُوبْ
بْدِيتْ نوَكّلْ الرّاسْ المغلوبْ
ونزِيدْ نْقَوّسْ ضهرُو المكبُوب
---------------------------------------------------
المعقُول راسُو مسكين منتُوفْ
مللِّي يْنصحك تجاوْبُو بْ أوفْ
--------------------------------------------------
العقل المنوّرْ.. البق مايْ قرّبْ ليه ولايْ مسُّو
والعقل المظلامْ يْتجمعْ عليه أو دَمُّو يْ مصُّو
---------------------------------------------------
ذخل من الحج بالطّبّالة وْالغيّاطة
أو هو كايْ صدّقْ غير الشيَاطة
---------------------------------------------
الزمان مْرَمّا.. وانا تُوبْ
إقيَّلْ إجَبَّدْنِي أو مانْ تُوبْ
---------------------------------------------
الزمان حمام..أعصابِي فيه طلقتْ وْرخِيتْ
غير طوّلتْ عصّرْنِي أو خرّجْ منِّي الزيت
----------------------------------------------
من كثرة شوقِي ليكْ واللِّيتْ نهَرْتْلْ
فْ دموعِي وعذابِي نكسكسْ وْ نفْتْلْ
أنا نحيِي الذكرياتْ أو هي فِيّ تقتْلْ
---------------------------------------------
غيرْ خرّجتْ كلامِي وْ طلقتْ سراحُوا
كل أعضاء جسمِي تْهَدْنُوا وْ رْتاحُوا
واللاَّ عقْلِي يْتْمعّنْ وْيْتْمتّعْ بنورْ صباحو
---------------------------------------------
إلى شفْتِي الوردة دابلة سقيها
يْمكنْ عطْفْكْ من الموت إينجِّيها
--------------------------------------------
مرة مرّة سمع للأحمق واشْ إي قولْ
تلقى راسك وسط الحق و المعقولْ
تنسى بللِّي الأحمق أحمقْ أوْ مهبولْ
تتمنّى تكون أحمق أو تْفَيّقْ المسؤول
اللهم أحمقْ إيقُولْ الحق واللاّ كذّابْ مدلولْ
--------------------------------------------
مللِّي تسلّفْ صاحبكْ غِيرْ تْوادْعْ معاهْ
يا إمّا ضربُو وْ عايْرُو واللاّ تْسامحْ معاه
--------------------------------------------
قاليِّ سلّفْنِي أوفْ راسْ الشهر والله ليكْ حتى نْردْهُمْ
سلّفتُو وْبْكِيتْ على فلوسِي اللِّي عمّرْنِي ماغا نشُوفْهمْ
-------------------------------------------
قْبْلْ مانْسَلْفُو الفْلوسْ إلى ماجاشْ، فْ التيلفونْ يْعَيَّطْ
مللِّي بْغِيتْ فْلُوسِي واللِّيتْ نْرَقَّعْ عْلِيه الدْرُوبا أو نْخَيَّطْ
-------------------------------------------
عطاني الله إلهام يْبْنِي أحلامي…… وانا بْفظلُو عطِيتكُمْ من إلهامي
عطيتكم أشعاري،أمثالي أو حِكمِي…نقيّلْ نشطّحْ حروفِي أو قلمِي
على عقلِي طيّحتْ لْثامي ………على لساني كسّرتْ لجامي
خوذوا ما بْغِيتُو من كلامي …….نتمنى عطاء الله يبقى قدّامِي
حروفِي هي إلهامي… إلهام شريفة بُصفا
مرَّة مرَّة خاصنِي نْحْماقْ
باشْ مانْحْماقْ
نْخَرَّجْ عَقْلِي نْهَوِّيه
باشْ مايْخْرجْ عَقْلِي
أو مانْخْرجْ على عقلِي
نْخَلْعُو بْحْماقْ العصرْ
باشْ مايْتْبْلى بالحماقْ
كانْ ساريهْ فْ حماقْ النَّاسْ
باشْ ما يْطِيحْ عْمى فْ الحْماقْ
مرَّة مرَّة خاصنِي نْحْماقْ
باشْ مانْحْماقْ
نْسى المعْقُولْ
نذْخلْ فْ المجْهُولْ
نْضحكْ معَ اللِّي يْضَحْكُوا عْلِيَّ
واللِّي كانْضْحكْ بْ اهْبالْهُمْ
وسط ضحكة الزمانْ
مرَّة مرَّة كانْسُوطْ بحالْ الِّريحْ فْ راسِي
باشْ مايْسوطْ الرِّيحْ فْ راسِي
كانْخَرَّجْ الفرخْ من القْفْزْ
باشْ مايْطِيرْ لِي الفَرْخْ
كانْ حْماقْ مع حُمَّاقْ الزواقْ
حُمَّاقْ غْلافْ الرُّوحْ
حُماق المادة
كانْ حْماقْ مع اللِّي لسانْهمْ طويلْ
على والُو
عْلى الريحْ
كانْ حيَّدْ هْضَرْتي من الميزانْ
مع اللِّي ماعنْدو ميزان
اللِّي الهضرة عندو عْرارْمْ
نْبْقى غادا جايَّا فْ الهضرة
مع اللِّي يْدخلْ وِ يْخرجْ فيها
قافْزة مع اللِّي يْخرجْ من القفص
مْجَبْدة مع اللِّي لْسانُو مْجَبَّدْ
ماضية مع اللِّي لسانو ماضِي
حاضية جنابِي
باشْ ما نخْرجْ من الجنْبْ
باشْ مانْولِّي مْجَنْبَة
===================
ذخل من الحج بالطّبّالة وْالغيّاطة
أو هو كايْ صدّقْ غير الشيَاطة
-----------------------------------
الزمان مْرَمّا.. وانا تُوبْ
إقيَّلْ إجَبَّدْنِي أو مانْ تُوبْ
----------------------------------
الزمان حمام..أعصابِي فيه طلقتْ وْرخِيتْ
غير طوّلتْ عصّرْنِي أو خرّجْ منِّي الزيت
-----------------------------------
من كثرة شوقِي ليكْ واللِّيتْ نهَرْتْلْ
فْ دموعِي وعذابِي نكسكسْ وْ نفْتْلْ
أنا نحيِي الذكرياتْ أو هي فِيّ تقتْلْ
-------------------------------------
غيرْ خرّجتْ كلامِي وْ طلقتْ سراحُوا
كل أعضاء جسمِي تْهَدْنُوا وْ رْتاحُوا
واللاَّ عقْلِي يْتْمعّنْ وْيْتْمتّعْ بنورْ صباحو
------------------------------------
إلى شفْتِي الوردة دابلة سقيها
يْمكنْ عطْفْكْ من الموت إينجِّيها
-----------------------------------
مرة مرّة سمع للأحمق واشْ إي قولْ
تلقى راسك وسط الحق و المعقولْ
تنسى بللِّي الأحمق أحمقْ أوْ مهبولْ
تتمنّى تكون أحمق أو تْفَيّقْ المسؤول
اللهم أحمقْ إيقُولْ الحق واللاّ كذّابْ مدلولْ
----------------------------------------
مللِّي تسلّفْ صاحبكْ غِيرْ تْوادْعْ معاهْ
يا إمّا ضربُو وْ عايْرُو واللاّ تْسامحْ معاه
----------------------------------------
قاليِّ سلّفْنِي أوفْ راسْ الشهر والله ليكْ حتى نْردْهُمْ
سلّفتُو وْبْكِيتْ على فلوسِي اللِّي عمّرْنِي ماغا نشُوفْهمْ
----------------------------------------
قْبْلْ مانْسَلْفُو الفْلوسْ إلى ماجاشْ، فْ التيلفونْ يْعَيَّطْ
مللِّي بْغِيتْ فْلُوسِي واللِّيتْ نْرَقَّعْ عْلِيه الدْرُوبا أو نْخَيَّطْ
----------------------------------------
تاتا ماكْلْتْها غير الناموس وْنْعاسْها علْ الحديدة
وِلا شفْتيها ديما لابسة كسوة ملونة جديدة
----------------------------------------
على غِيرْ واجِي وْكولْ مخْ الراسْ؟
شوْطُو حتى يضحك وِ بانُو الضراسْ
فوْرُو أو عادْ ضربُو ضربة الفاسْ
-------------------------------------------
مللِّي جلستْ أو هو يَحشِي لِي الهضرة غير بالفنْ
غير عمرْتْ مزيانْ أو علَّقْتْها لُو حلقة فْ الوْدْنْ
تْفَشِّيتْ حيتْ خوِيتْ المْزِيوْدة واللاّ إي كشْكشْ كِ الجنْ
بغى إي ردْ ليَّ صّرفْ..دوّرتْ رجلي وْيْدِّي أو درْتْ ڤنْ.. ڨنْ
-------------------------------------------
اللِّي شافُو مشحّمْ
إيقولْ شبعان لحم
أو هو منفوخ بالهمْ
--------------------------------------------
شافونِي ساكتْ..قالوا هذا درويشْ أو مازالْ مسكين نِيّة
دارونِي الوسطْ أو بغاوْا إي قصرُوا وِ ضحكوا علِيّ
جمعتْ معاهُم بْ عقلِي وْ لسانِي.. وْ تكَمشُوا تحت رجْلِيّ
بقيتْ ندَرْدكْ علِيهُمْ الليل كامل بحال القعدة والبستِيلية
==================================
اللى مَا عَنْدُو ما يْشَدْ إيشَدْ فَمُوا
لى رَبا الغراب يَنْقَبْ لُو عٍينوا
ليبغاها كلها يخليها كلها
السر فالساكن ما شى فالمسكن
اللى بغا يكبر شانوا يحرث مع قرانوا
رحم الله من زار وخفف
لى بدلك بخيط بدلوا بحيطْ
الراجل بالهمة أما اللحية ما عدمها عتروس
حرفة بوك لا يغلبوك
دخْلُوا يَخَرْجَكْ
وَريهْ وَريهْ وايلا عْمَى سيرْ وخليه
قولوا الله يهديهم داروا الخير مع الناس ونساو والديهم
ضَرْبَة بْدَمْهَا ولا كلمة بسَمْهَا
همومك عملها فى شبكة شى يطيح شى يبقى
الشبكة عايرات الغربال قالتلو عينيك كبار
لى ما عندو العسل فى داره يعملو على لسانوا
جالس فى الزبالة ويحكم على الذبانة
========================
اللِّي حاجْتُو فيكْ
أنت تهرب منُّو
أو هو لاصقْ فيك
اللِّي حاجتُو بيكْ
تعيى ما تعايْرُو
أو هو يشْكر فيكْ
تكحّلْ عليه بالعمى
هو بالضحك إي كحّل ليه
تخوي وْتهرب من داركْ
أو هو الصّالون معمّر ليكْ
تولِّي بالأعصاب تشطحْ
أو هو فرحان إي طبّل ليكْ
------------------------------------------------------------------
المنكر كايْ فرّشْ لك الضحك والآداب والصوابْ
تولِّي مدخلُو لْلصالونْ فْ عوطْ تخرجُو مع الباب
-----------------------------------------------------------------
العنْبَة مع الوقت ك تولِّي زبِيبة
والزبيبة عمرّها ما ترجع عنْبَة
إلى مشى الشباب والصحة الحبيبة
مايْنفْعُوكْ صحابْ وْتْوَسّدْ العتبة
-----------------------------------------------------
كولْ غيرْ من الحْلال
تعِيشْ مرتاح البالْ
واخا تولِّي عامر مالْ
ما ترجعْ صحة ولا جمالْ
ما تشري حب،ولا العمر يْطْوال
----------------------------------------------------
اغْسلْ النُّقرة واخّا قديمة ترجعْ تشْعلْ
الوردة الجميلة شحال ما عاشْتْ تدْبلْ
أو جمالْ الرّوحْ وْ صفاها عمرُو ما يْرحلْ
----------------------------------------------------
اختارْ المْرا العاقلة،الذكية،حلوة اللسان وْ الفحْلة
إلى كانْ غِير على العِينين و السّالفْ راهُم عند البغلة