خليت فيها...

خَلِّيتْ فِيهَا

خَلِّيتْ فِيهَا

گَدّْ مَا بْكَاتْ

دْمُوعِي حْرُوفْ

سَبَّبْهَا المَجْدُوبْ فْكْلاَمُ

جْوَاجْ الحَرْفْ بالكَتْبَة

حَكْمَة وَقْوَافِي

آشْ هَادْ الخَرْبَة

بْغَاتْ تْرِيبْ

فْدْخَالِي

وَعْلَى جْنَابِي تْطِيحْ

رْدَمْ طَافِي

آشْ هَادْ الكَلْمَة

بْلاَ مِيزَانْ بْكْفُوفُ

يَعْبَرْ

غْيَارِي المضْيُومْ

فعْبَاري وَافِي...


خَلِّيتْ فِيهَا

وَحْلَفْتْ

وَحَنَّتْنِي شْجَرْ الدُّومْ

فدَاكْ اليُومْ

الطَّالَعْ بْوشَامُ

عْلَى ظْهَرْ كْتَافِي ...

شْرَفْتْ بِينْ حْرُوفِي

سْمِيَّة

حْلاَلْ فدْبِيحَةْ الفَالْ

سَالَتْ الفَا ..دَمّْ

وَبْقَا اللاَّم ْ

يَوَلْوَلْ فْخَطْوَاتْ جْرَافِي...


فِينْ أَنَا

مَنْ دَاكْ الرّْدَمْ

عْرَارَمْ

وَدَاكْ لَحْجَرْ

سْلاَلَمْ

وَدَاكْ التْرَابْ

عْلِيهْ مْشِيتْ

واِلَي غَبْتْ

غْطَايَ حَالَمْ

فَسْلاَفِي...


دَرْتْ لحَرُوفِي قَفْزْ

فِصيفَةْ غُرْبَالْ

يطِيحُو مَنُّ

دُوكْ لِّلي

مَنُّو وَعْطَاوْا

وَيَبْقَى فْظَنُّ

دُوكْ للِّي

حَنُّو وَقْسَاوا

فخْيَالْ طْوَافِي ...

بَكِّينِي يَادَمْعَة

ووَاسِي شْفَارِي

الَى طَاحَتْ

عْلَى خْدُودي لَغْرِيبَة

وَخَلِّي مَاكْ

فْلُونْ وَجْهِي

دَافِي ...


رَبِّي رَاكْ عَالَمْ

مَابِيَّ

رْجَايَ بِينْ يِدِيكْ

نِيَّة

وَزِينْ فَعْلِي

فْحَطَّاتْ گَلِْبي

شْوَارَبْ اقْوَالِي

مَرْبُوطَة بِالكِيَّة

عْلَى جْبِينْ

مكْتُوبْ غَدَّ

والغُدَّة

عَلَّة

مَضْرُوبَة فعَلَّتْهَا

مَا تَشَافِي ...

مَجْرُوحْ هَادْ اللِّيلْ

فلْبَاسِي جَرَّانْ

فنْكَادِي حَرَّانْ

فغْيُومِي لْوَانْ

مَا گَدِّيتْ عْلِيهْ

يغَنِّي بلْحَانْ

نُوطَة مَذْبُوحَة

وَنَغْمَة

عْلَى هَجْهُوجْ الحَالْ

فِيهَا سَرِّي

بِالوَافِي ...

نْمُوتْ أَنَا

وَيعِيشْ حَرْفِي

فذَاتِي دُودْ

يَنْبَثْ حْرُوفْ

دْوَالِي الغِيبَة

حَضْرَة فغِيوَانْ

يَّامِي

ويُومْ عَشْتْ

فتْقَرْقِيبْ

الدَّنْيَا

سْكَاتْ اعْرَافِي ...

العزيز
محمد مومر
هنيئا بتوقيع الديوان ، كم تمنيت أن أكون بينكم يوم 27 يونيو لك كل التألق.....


خَلِّيتْ فِيهَا

وَحْلَفْتْ

وَحَنَّتْنِي شْجَرْ الدُّومْ

فدَاكْ اليُومْ

الطَّالَعْ بْوشَامُ

عْلَى ظْهَرْ كْتَافِي ...


مقطع منساب في لغته بناء شعري جميل تأويل متعدد في معناه هنيئا لك ولنا بمتعة الكلام.