لبست دربالت الحاله
مرقعه بالصبر والتمياك
باين مجدوب يا لاله
أنا لي بغيت نعيش معاك
ما تحيرني فيك مساله
راني حافض كيد النسا
ما جا صبري يتساله
حتى ولفت راسي ننسى
وخلطت حالي بين الناس
وانا في روحي نبكي
نسلك نقولك لاباس
وانا من دنوبي نشكي
ما كيفهوم حياتي تتقاس
على اليوم لاخر نحكي
ما ضامن حياتي بحساب
إو كيف نتغر بحرامها
مدوزها مكتاب
نعدي حيران في يامها
مرة نتجر بالنور
والدمع يسيل محبه
ومره نرجع للور
نغفل نتغر بالصحبة
عارف ليام تدور
مجرب حرك يا الغربه
وعارف الحاله بخور
ودواك يا ضري جدبه
..........
مراقب حلمي يتساله
وعمرو ما بدى
جراحي دايره حاله
وراني عييت بعدى
...........
وفلجنب لمضلم
نحلم
وتزيغ عيني بالتاويل
إلى جيت نفكر نندم
وعارف زادي قليل
ونحبس مواج لحروف
خايفها تفضحني
إيه سبابي الخوف
مواجها لا تفيقني
ونثور على هاد الحاله
مالكي فالهم حابساني
معديا بيا يا لاله
وانا ما قانعش كيراني
وهزيت يدي لمولاي
_ خليكي لاش تسهاي _
يا ربي عمري يتعاود
وعمري ما نعاود
