ما ڭاد نضرب الطّمْ

[b]حْلمْتْ نكون خفّاش
يحميهْ الظلام
بعيد علْ التفتاش
حلمت نكون فراش
ركيزةْ ليّام
بعيدْ علْ التحراش
حلمت نكون فلاش
يضوّي الحْلام
بعيد عل التشاش
حلمت نكون عْشاش
تفرّخْ الحْمام
بعيدْ علْ الحناش
حلمت نكون جنّة كبيرة من الْعْراش
تْعلّي صوتها فْ العْوام
ويذوق ريق زهرها كل عطاش
تجبّد ليلي ونا ما ڭاد نضرب الطم
بقيت نحلم ونعاود نحلم
بانْ لي شروق الشمس غْفا
والنهار سرّج عودو وعلّق
خلّا الحلام كَتْفوّهْ طامعة فْ الصفا
ويذوب ظلام الكدرة ويتفرق
واش حالة الحق اليوم تخفى
على كل عقل مطرّق
الخيوط تخبلاتْ من كثرةْ الجْفا
والفلكة قرقبات علْ البق
ولا شي نهار عْلى ود الوفا
الغيرة تجينا وكلشي يتعتق

بقيت نحلم ونعاود نحلم
وضفاير الظلام توسدتْ الغْشا
سمعت صوت من السما يبرڭم
وياك حروفك راها مكنشة
غدا أو بعدو تورم
وتّرْطقْ فْ حلوقهم المريشة
غير زيد حلم
را الحق فْ كعلالةْ الذيب ترشى
وِلا بغيتي تفهم
دير بحساب حلاوةْ الطرشة
قبل مايشرق نهارك وتندم
على فتيح الفم وشطارتك المفششة
خبارك عند المقدم
تكتباتْ بْ ألف ريشة وريشة مْفيْشة
وشحال ڭدك ما تستغفر وتمتم
يا البايت ديما وحدو بلا عشا

كون غير ضربت الطم
ماكاين مايتشاف
ولا اتهضم

نص معبر وحداثي

عدد الرسائل : 442 تاريخ التسجيل : 21/02/2011

واش إيفيد تضرب الطم ولا تتكلم

إلى تضرب الطم ابقيت تم

وإلى انت تتكلم ما تشرب غير السم

قصيدتك معبرة وواقعية أتمنى لك مزيدا من التقدم والإبداع تحياتي أ. محمد بوستة

أشكرك أختي فتيحة . هذا الوجع الزجلي يجمعنا ، ولا يمكن معه أن نكمم الأفواه ونسكت ، فللكلمة بالعامية سحرها الأخاذ...

آخويا اللي ليها ليها

موتة وحدة تلزم غير تكلم..

برافو عليك اخي

شدني قلمك المميز

بالتوفيق

أمطرنا كثيرا

شكرا أختي مريم ، أرجو أن يسعفني القلم دوما للتوصل معكم.

زائر

تشجع و تكلم

و لا ترفد هم

زيدنا من كلامك الشفيف

يتحلو عينين لكفيف

زمم و لا تضرب الطم

لا تخلي الواد الحامل يدينا

تكلم حتى يتبخر الظلم

و يعود لساننا على الناس خفيف

شكرا للسان يتكلم بهموم الناس

دام لك الألق اخي الفاضل محمد

تبارك الله عليك أيها الزجال الجميل
الله يعطيك الصحة

بارك الله فيكم جميعا. سنواصل المسير دون " ضرب الطم" ، ولا بد أن يعلو صوت الزجل بعلو أهله واتحادهم. مودتي الخالصة للجميع.

موضوع: الأحد مارس 11, 2012 10:57 pm

ناجية عامر كتب:: تشجع و تكلم

و لا ترفد هم

زيدنا من كلامك الشفيف

يتحلو عينين لكفيف

زمم و لا تضرب الطم

لا تخلي الواد الحامل يدينا

تكلم حتى يتبخر الظلم

و يعود لساننا على الناس خفيف

شكرا للسان يتكلم بهموم الناس

دام لك الألق اخي الفاضل محمد

شكرا أختي ناجية . بنا جميعا سيتكسر الظلم ويسمو الزجل.

حميد يوسفي كتب:: كون غير ضربت الطم
ماكاين مايتشاف
ولا اتهضم

نص معبر وحداثي

أشكرك من صميم القلب . لن نضرب " الطم " مهما كانت الأحوال، سنرفع جميعا أصواتنا
جاهرين بالحق وبالكلمة الملتزمة.

» ع جيب يا فم و ڭول
» ضي لڭلوب
» ڭَا نَة حْرّانَهْ
» بوڭليب و المحبة فين تصيب
» لــــڭـــنــــاطــــر و الــــغـــيـــث وخـــــايّــــت آخــ