كُن كان ب يدِّي
لابس قدي ،ماشي حيت بغيت
ولكن جات فوق جهد .
كن كان ب يدي ،
كن شاط عليا الخير و لخمير و لبست لحرير
كن علَّفْت مَّالين بَّخْ الذرة وشعير وقلت رًّا ..سيْر
كن كان ب يدي
كن رجعت لكرش ميِ
تولدني خيال،ما يقهرني غير ظلام...
يهرس جهدي و يغيَّب قديِّ ..
نمشي ب وجهي كحل
ما عندي علاش نحشم ..
نرسم خيالي ف لْوْطَى ب ريشة زْمان
يهرب زمان من مكاني
و نصبح غول عل الزَّمَان والمكان…
كن كان ب يدي
نسكن خيالي
ما يهرسني جهد ،ما يقرصني برد
ما يكمشني صهد،ما يحكمني عبد
كن كان ب يدي،
نعشق ذاتي،ن هرس بها ظلام الليل
يلا خْرَجْت طْريق تقاد لِياّ الميل
نسرق من يامها سويعات فشوش...
تْعَاوَدْ فيا تْرَبْية من جديد
تقمط،تخرق تحَمّل، وتْرَارِي ..
كن كان ب يدي،
نَحْجَب باش ن بدل اللون
ما نبقى سْواد ف بياض الكون
تنسجني يَّاِمي مْلْحْفة
تستر عراي عل لعيون الجايعة ف د الكون
كن كان ب يدي ،نكري جَّهد عندي ترَّاس
يعيش عبد ف كُمِّي
نفتق شدقه ،
ن شَلْ جهده ب سَمِّي وسم عقارب الوقت
ن هرس جّهد للي سقاني من كاس الذل
طير نعاسي من عش الليل
حفر حيطي من ساسُه
وساسني عرام ف مَزْبلْة الوقت
كن كان ب يدي
كن صنعت من همومي مسامر
ن طرقها ف ذات جّهد
و يْحَيّدها يلا قد ؟ !...
لكن جهدي نتفوه مّالِين جهد
يد زمان كتهرس القد
تخلي للي عنده جهد ،يخاف على جهده
يَدْعي بالضعف،وخا لمَْضَا ف يدُّه
من قلَّتْ جهدي
لبسْت شراع،حفنت من الأمل دراع ،
ركبت خيالي ومشيت ليه
حنيت الراس ل ريح صَّهد،
خليتها دوز و ِهياّجارَّا جحلال جَّهد
و أنا كنقول :
حتى صهد ما يدوم على صهده
لابد تجيه بنت سمْاَ"غيمة" وتبرد جهدُهه
