حق المــــيـــــزان
حروف الميزان مسخت
وصروفو ذبلت
رافدة هم كبير
عوالة على اكتاف خاوية
ساكنة دوار الغشم
لا حكمة لا تدبير
وناس من حر قلوبها
هاملة فشعاب ملوية
نظمت الهم
وطرزت كلامها غيوان
الصيغة بلدية
دنك داني دان داني دان
والحروف مكوية
بنار الفراق
والغشيم ما فاق
من حر هاد الكية
يا همال هاد الواد
لغاكم جاني بعيد
لله قربو لي
نسقي خاطري
ونبرد النار اللي بي
ياك أنا كمري
ربيت جناحي ف أحضان العركوب
تعلمت لغة الفلاحة
ف الشمس الوضاحة
ب لمحراث شقيت أرضي
ورشيت فعروقها زريعة بلدية
وسواكي فايضة
حيات العروق المخفية
أو صارت أرضي زاهية وردية
أو كان حتى كان
وشفت الصابة ف كفوف الفدان
تعيط للحصادة
تبتو القول ولا تنساوشي الشهادة
ونزلت سربة رجال
المناجل تلكلك
والعيوط ع ل لسانها ردادة
كبدو التادلة
ع ل التادلة
للنوار هوادة
وخيول دكداكة
كتحنحن تحنحين
لدراس سكادة
وعين الشرقي لاحت هبوب
والمداري تابعة المكتوب
توب أخاطري توب
ياك الشرقي
د التبن وخل لحبوب
وهلت زغاريت الفال
الصابة زينة
سيدي ربي فرج ضيق الحال
وكان حتى كان
أو ما نسيت حق الميزان
دنك داني دان داني دان
يا الشمعة يا الرفرافة
يا عيون الليل
يا سريرة الولافة
ركوب الخيل
النخوة والكرم والضيافة
تهليل البارود
والخيالي شق صدور العرافة
الغيطة تلالي
والطبول تشالي
فينكم يا الشرافا
مال لوطا رجع ملغوم
كلو حافة
مال رجال الليل
صارو خوافة ؟
مال الغشم ركب العقول
والعيون شوافة ؟
كلامي محقق موزون
ما هو ش خرافة
أو كان حتى كان
أو شافني حال الميزان
مرة مهموم أو ديخان
تالف بين الحق والبهتان
مرة طلعة النهار عليه تبان
تقول راح الليل والحال زيان
أو مرة غول ينهب مال الجيعان
صار لعبة تخوف كل ضعيف
في هاد الزمان
دنك داني دان داني دان
و أنا ما نسيت حق الميزان
عبد العالي الوالي
