دك ...دك

[rtl]دكْ .. دكْ

دك ... دك يا مهرازي 
دك فراسي فيقني 
دك.. دك خليني نتحير 
فكرني بهواسي 
فكرني براسي معانق الحق 
نتفكر كلامي ماشي 
رافع راسو 
ينتف الجور من ساسو 
ديك الكلمة حارة فعقلي 
مرَّة فلسانهم 
دك .. دك خليني نعاود لحساب 
نعرف مع من راني 
نختارو ول نختارني 
اللي ما يكول الحق 
فراسي براني 
كتبتو حرف فالدخول 
نشطبو وسخ من المعاني 
دك .. دك أحياني 
مع الزمان ضاع زماني 
مع الحرف رجَّعت كياني 
لقتني فيه 
وفصفو لقاني 
كتبتو حرف 
فالقصايد ضواني 
ومشينا حتي لقينا 
السر ساكن فالمعاني 
الكلمة لبيبة 
العقل بها يكاني 
الكلمة حبيبة 
ف الخاطر تلقاني 
وردة مفتحة 
تعطر جناني 
جناني شحال وهو يابس 
ملي قطهت الحس 
كلت نتهن 
ولساني ما هناني 
شدني من عقلي 
جرني 
خرجني 
من طوعي 
حوس بخاطري فالحروف 
وكالني كيف بغاني 
ولقيتو قاصح 
على الغر ما وطاني 
اللسان صعيب 
هاد المرة ساعفتو 
وفهم عقلي 
حطو على الحرف 
اللي به نكاني 
دك .. دك يا مهرازي 
را العمر تقسم فالنص 
والثاني ما نضمنشي 
يكمل ول معاه
الباقي من حروفي يمشي 
الواجد هو هذا 
واللي جاي 
خليتو لخواطركم به تفشي 
تنسج منو قصايد 
يكمل الباقي من عشي 
إو خلوني نمشي 
راني ما سخيت 
وهاد الحرف عشقو فالدم 
يجري ف العروق يرشي 
سلفتو العمر 
وما بغ يمشي 
دك.. دك يا مهرازي 
خلي العقل يكلم الغاشي 
عبدالعالي الوالي في مراكش 2013/02/21[/rtl]

ما اصعب دكت المهارز لان لمهارز فيهم ؤفيهم مهراز الراس مهراز النحاس ؤمهراز لكبير اطير الراس اخى انك تتالق قصيدة بعد قصيدة ولو انك تكتب فى فن الزجل الحر الدى لا شروط له وجل الزجالين يسمونه بالحكى وهدا النوع من كتابة الزجل لا يقبل الكلمات المعربة  وانت ما شاء الله لك   خزان من العبارات والكلمات با للغة العمية تابع ووفق الله

الأستاذ الكريم مصطفى زين سعدت كثيرا بحضورك الراقي لك مني الود صديقي أحاول دائما الإنتصار للكلمة شكرا لك على تشجيعك

الأستاذة زهرة إطلالتك البهاء شكرا لك ولتتبعك الدائم لحروفي المتواضعة لك المودة

يسعدني حضورك أستاذ مصطفى لك المودة