غـاديا كـي عسالـة
دايرة شغل البهالــة
تقلب على تــرفيحـة
مصاحبة مول التنفيحة
مخـليا مـوراها ريحـة
خانزا تقولها زبالــة
تعجبك غير فالتكميطـة
راسهامربوط بشطيطة
والصاية تقول تلميطــة
فحالتها دايرا خبالــة
لعزيري داير حصيدة
فـراسو مركب مصيدة
وجهو تقول عـصيدة
سيادي واينـي حالــة
فرجلو لابس عـمارة
موتور صايك ولا سيـارة
تقولو صايك طيـارة
وهو باقي يلعب بمـالـة
عند بالو الزين المكمول
تشوفو تقولو مشغول
حالو مشوه و مدلـول
مقيح كيف الدمـالـة
مالو حال بنات اليـوم
ياقوت وغالي فـالسوم
لاموض وكان ومعلوم
غي لي مابغات تكون غزالة
وليدات الترابي لمـلاح
يطيحو لفليسات صحاح
قاريين ولسونهوم فصاح
ومـا يخـالطوشي من والا
بنت الوقت بنيتات الربح
كـامزة ولسانـهايدبح
ماضيا تداوي مـا تجرح
قـافزا تقولـها شي بـالـة
البنت دير لراسك قيـاس
لهمـة ماشي ديمـا اللـباس
ولا غير تقلــد وخـلاص
وخـا تـكونـي مهـزلـة
ألولد لاش مساعف لبــيك
أيـلا بغيـتي كلشي يبغيـك
دير مستقبلك بين عيـنيـك
وخطيك شغل الغـفالـة
ألولد عاجباك التفـــريشة
بـين رجليك داير شيـشة
هـذا شغـل التحـشيشـة
والشمكــارة والسوالـة
