قبل أن أكف عن الكلام
تقادَى لكْلام:
آش يكَول الرَّاوي
خلا ميزان لكلام مساوي
رجع لقا كفوفو رشات وعابتْ..
آش نكول انا
وشكون يسمعني؟
ويلا سمعني واش ينفعني؟
ويرد شمشي اللي غابتْ..
*******
آش يكول الميت كَدام غسالُو..
باش من كلام ينطق
وفيـــــن الجّـهد باش يســــالُو..
ايلا روحُو ذابت ف كَاس لعْمرْ..
آش تكَول لبلاد ايّام خريفهَا...
ف وجه اللي جوّعُو شرقها
وطوّعُو ريــــــــــــــــــفهَا...
بْلقهْر والرْصَاص وحْريق لجْمرْ..
*******
تقادَى لكْلام
يْبس، وسَالت حروفُـو
بعِيني شفتها
خارجة قطرة قطرة من جوفُـو
*******
تقادى لكلام
عذروني
هاذي غير دوايتي فاضتْ..
تقادى لكلام
عذروني
هاذي غير شواقي
وبالـــزّز مني نـَـــــــاضتْ..
*******
ونهار يرجع لكلام مساوي
والميّت داوي
وحُوض لبـــــــــلاد راوي
ونتقاسمُو جمـــــيع الغلّة..
فاكَدوني
تلقاوني معانق شمشي
وسط شمـــــــــــوش شلا..
وكَولو:
عاش حياتو يكتب
مات بحـــــــــــروف العلّة..
