*مصدر المسرحية:
المسرحية معدة عن فكرة النص المسرحي: (الفيل يا ملك الزمان) لسعد الله ونوس.
*فكرة المسرحية:
المسرحية صراع بين الامتناع الجبان عن الكلام، وبين الإقدام الجريء عليه.
*أحداث المسرحية:
يعيش أهالي إحدى القرى إرهابا وتعسفا من لدن فيل؛ لا يدع يوما يمر دون أن يعيث فسادا في البلاد، أمام مرأى ومسمع العباد. فلا أحد في مقدوره أن ينبس ببنت شفة، ويصرخ بأعلى صوته في وجه الظلم والطغيان.
ذات يوم، يقرر الأهالي أخيرا تكسير نطاق الصمت الذي ضربوه طوعا على أنفسهم، ووضع حد لتسلط الفيل وجبروته، ومن ثم لمعاناتهم الطويلة. بيد أن محاولتهم هذه باءت بإخفاق ذريع؛ فبدل أن يخرجوا من بوتقة الحصار ويتنفسوا الصعداء، قاموا بإحكام إغلاقه عليهم إلى إشعار آخر غير مسمى.
*شخصيات المسرحية:
1- شاوش حاكم القرية.
2- حمادي الرابوز: مجنون؛ يكرر فقط صوت الخرفان: باع.
3- ولد حادة لهبيلة: متزعم المحتجين.
4- عودينة: واشي القرية.
5- الرجل الأول: من أهالي القرية.
6- الرجل الثاني: من أهالي القرية.
7- الرجل الثالث: من أهالي القرية.
8- المرأة الأولى: من أهالي القرية.
9- المرأة الثانية: من أهالي القرية.
*المدة المرتقبة للمسرحية: مابين 15 و20 دقيقة.
المشهد الأول
(الفضاء عبارة عن ساحة عمومية. الناس في حالة جيئة وذهاب)
- حمادي الرابوز: (يظهر) باع باع باع
- الرجل الأول: ياك لاباس أ حمادي الرابوز؟
- حمادي الرابوز: باع
- الرجل الثاني: مالك علاش هز هاد لبطانة كلها دميات؟
- حمادي الرابوز: باع
- الرجل الثالث: يا كما الديب؟
- حمادي الرابوز: باع (يختفي)
- المرأة الأولى: ياربي لما بقي ستر
- الرجل الأول: لا حول ولا قوة إلا بالله العلي العظيم
- المرأة الثانية: لي ما خرج من الدنيا ما خرج من عقايبها
- الرجل الثالث: صافي الرابوز ديال عمي حمادي تفرقع، وطار له لفريخ
- الرجل الثاني: طار له لفريخ.. وانت قول طار له بيبي.. هدا ضرب غ فريخ هدا؟
- الرجل الثالث: البارح عاد كان بعقلو
- الرجل الأول: هلكتو في واحد الطرح ديال ضاما.. شديت له الواد، وما نفعوه معايا جواد
- الرجل الثاني: وها هو اليوم صبح دارع في لبلاد
- الرجل الثالث: سبحان لي يبيتها في شان وصبحها في شان.. سبحانك يا مول الشان
- المرأة الأولى: مسكين معرت مالو؟
المشهد الثاني
- الرجل الأول: وانت مال نسيبك أولد حادة لهبيلة؟
- ولد حادة لهبيلة: (يظهر) ما في روسكم ما يتعاود زعما؟
- الرجل الثالث: والله ما في روسنا شي حاجة
- ولد حادة لهبيلة: حسن.. خليكم هكداك ما جايبين خبار أش طاري في الدنيا.. زعما غير عرفتو غادي ديرو شي نبقة.. والله لا درتوها.. لا درتو شي حاجة غير سيلو ليا من هنا لهنا
- الرجل الثاني: ياك ما كاين باس؟
- ولد حادة لهبيلة: ما كاين باس؟ لاباس وا لوباس.. لاباس وا لوباس.. سخنو ليا شي طرح نغنيها لكم، وجيبو ليا القعدة نبقى ندردك زيد درك فوقها تا نطيح لكم بالقوايم هنا.. وديك الساعة شوفو لي ينوضني.. والله لا نضت لكم وخ طير جرانة.. فين مشى داب؟
- الرجل الأول: مشى من هنا جهت القبلة
- ولد حادة لهبيلة: علاه القبلة من هنا بعدا.. فين عمرك حطيت جبهتك لارض انت بعدا؟ (يختفي)
- الرجل الأول: وانت زعما تتصلي على هيدورت كركدان
- حمادي الرابوز: (يظهر من الجهة المقابلة) باع.. باع.. باع (يختفي)
- الرجل الثاني: لا حول ولا قوة إلا بالله العلي العظيم
- المرأة الثانية: بغينا نعرفو بعدا غير أش طرا؟
- الرجل الثالث: بلاتي.. بلاتي.. ها لي غادي يجيب لنا لخبار صحيحة ولمريضة بزوج
- المرأة الأولى: شكون؟ عِْودِينة البق ما يزهق
المشهد الثالث
- الرجل الأول: أش طاري في الدوار أعودينة؟
- عودينة: (يظهر) عرفتو نهار نفوتكم أنا غادي يضربكم لخلا (يضحك)
- المرأة الأولى: يالله سربي قول خلاص يا لبلا
- المرأة الثانية: خوي لمزيودة يالله
- الرجل الثاني: وليتو انتما تسولو فيه أ لعيالات؟
- الرجل الثالث: هدا ما خلا لكم فين تزيدو.. دا لكم الحب وتبن.. وحتى الكرفة
- عودينة: عمي حمادي الرابوج تربز له مخو (يضحك)
- الرجل الثاني: أش ربز مخ عمك حمادي الرابوج يا عودينة؟
- عودينة: ياك شحال من شهر هدا وهو تيعلف هادوك الخرفان للعيد الكبير (يضحك)
- الرجل الأول: إييه الخرفان عرفناهم، ولاو بحال خوتنا، مالهم؟
- عودينة: هجم عليهم فيل سعادة الحاكم في النبوري، وهو يمعسهم له بحال البرغوث (يضحك)
- الرجل الثالث: يا لطيف يا لطيف.. دارها ثاني الكافر بالله
- المرأة الثانية: الله الله فكرتوني في وليدي لعزيز عليا، أش بغيتو عندي؟
- المرأة الأولى: إييه مسكين كان تيلعب قدام المدرسة ما عليه ما به، حتى هزوه مرابعة بلا رجلين
- حمادي الرابوز: (يظهر من الجهة المقابلة) باع.. باع.. باع (يختفي)
- ولد حادة لهبيلة: (يظهر) وانت رجوع لله.. فين غادي؟.. واش غادي نبقى اليوم غير تابعك؟ (يختفي وراءه)
- عودينة: هاهو شفتو مخو كيف تربز.. تخربقو له سلوكة (يختفي وهو يضحك)
- الرجل الثاني: ونا البارح ياك دخل ليا دعاوي لبلا لبلادي وخلاها بحال إلى ضرباها الرعدة
- الرجل الأول: ورا حتى انت ما عمرك خرجت لعشور
- الرجل الثالث: وانت زعما غير حاضي وقاتو.. تيحقو عليك المكانة؟
المشهد الرابع
- ولد حادة لهبيلة: يا عباد الله را خصنا نشوفو ما نديرو مع هاد الفيل.. واش هو كل يوم تيتكرفس علينا وحنا عاطينو ظهورنا تيدير فيها ما بغى
- الرجل الثالث: واش غادي نديرو له زعما؟
- ولد حادة لهبيلة: أقل حاجة نديرو هي نمشيو عند سعادة الحاكم نشكيو عليه
- الرجل الثاني: أناري ميمتي حنة.. نمشيو حتى لعند سعادة الحاكم
- المرأة الأولى: ومالها أش فيها؟.. مال سعادة الحاكم بوعو تيعض؟
- المرأة الثانية: راه غ بنادم بحالنا بحالو
- الرجل الأول: إوا سيرو نتما حتى نتبعوكم حنا
- الرجل الثاني: أنا بعدا ما شي من هاد لبلاد كع
- المرأة الأولى: حتى واحد ما قاد يهدر
- الرجل الثالث: يهدر؟؟؟
- المرأة الثانية: ويلي ويلي ع الرجالة
- المرأة الأولى: لي مصاوبين غير بالنخالة
- الرجل الأول: ها لعيالات بداو كيدخلو وخرجو في الهدرة
- الرجل الثاني: بحال إلى الهدرة غير ساهلة
- الرجل الأول: زعما غير نوض وهدر
- الرجل الثالث: واش كتسحابو شريب أتاي هدا؟
- الرجل الثاني: هدا أ لالة راه الفيل ديال سعادة الحاكم
- المرأة الأولى: إييه.. إييه عرفناه بلي الفيل ديال سعادة الحاكم
- المرأة الثانية: ونا شكون لي غادي يشد ليا حقي في كبيدتي؟
- المرأة الأولى: الله الله مسكين شحال بقى فيا.. كان بحال بلعمان.. يالله كمل سبع سنين
- المرأة الثانية: مزغوب وزغبني الله معاه.. يالله دخل للمدرسة باقي ماشاف ما تشوف
- الرجل الثالث: حسن ليه تفك
- المرأة الثانية: سير الله يعطيك أفكة وتفكك من لكتاف نشاع الله
- المرأة الأولى: ماضي غير فهاد الهدرة.. لي شاف شي حاجة يقول الله يستر
المشهد الخامس
- الرجل الثاني: عنداكم سكتو ها عودينة تيحوم بحال ذكر ديال بودارع (يظهر عودينة)
- الرجل الأول: ورا خصو أما يوصل
- ولد حادة لهبيلة: خليوه يوصل.. حنا بغيناه يوصل.. راه غادي يوصل يوصل.. اللهم يوصل داكشي لي كاين بعدا
- الرجل الثاني: شوفو.. شوفو كيف تيجبد في ودنيه..
- المرأة الأولى: معرت فين باغي يلحقهم الله يبقي ستر مولانا
- المرأة الثانية: وتيدور في عينيه بحال ديال موكة
- عودينة: ياك ما كاين باس أزماعة؟
- الرجل الأول: نسولوك انت لي كع لخبارات في راسك
- الرجل الثالث: ما كاين حتى باس إلى اعطيتنا انت بالتساع
- الرجل الأول: وانتما فين يبان الفيل قدام هدا؟
- الرجل الثاني: الفيل بعدا راه تيجي كود.. وما هدا عندو الضرب ملاوط
- الرجل الثالث: الله يحفظ هاد المرة.. شوف على من غادي ينيش، وفين غادي يجيبها؟
- عودينة: لا..لا..لاباس عليكم
- حمادي الرابوز: (يظهر) باع.. باع..(يختفي)
- عودينة: هدا هو لي لاباس عليه بجاف بجاف بجاف (يختفي وهو يضحك)
المشهد السادس
- المرأة الأولى: أش هاد ليام الزرقة؟
- المرأة الثانية: الله يعطينا صبر من عندو وخلاص
- الرجل الثاني: هاد شي مكتبو الله علينا، ما بدينا ما نديرو
- ولد حادة لهبيلة: بدينا كلشي.. يمكن يسمع لنا سعادة الحاكم، وشوف من حالنا.. المهم نحلو فامنا ونشكيو.. الشكاية إلى ما نفعاتش ما غدياش الضر
- الرجل الأول: يمكن يطلع له البراد كامل ماشي غ السكر ويتقلق علينا.. وديك الساعة أجا ميفاكنا معاه
- المرأة الثانية: هدا راجل قاد يحل فمو ويهدر
- المرأة الأولى: ولكن باين بلي محزم غ بالكرطون
- الرجل الثالث: أنا سمعت يا ولد حادة لهبيلة بلي الفيل عزيز على سعادة الحاكم بزاف.. تيخرجو وتيدخلو بطبل والغيطة
- ولد حادة لهبيلة: راكم غير تتحلبو فيه مقعور.. واش عمر فيكم شي واحد شاف هاد شي بعينيه؟ شكون فيكم لي باغي ولدو المرة جاية يتكرص وما يصيب فيه ما يجمع؟
- المرأة الثانية: ما بقى أمان.. ما بقى أمان
- الرجل الثاني: سكتي يا هاد المصيبة ضرتينا في روسنا
- الرجل الأول: يا لطيف الطف بنا
- المرأة الأولى:علاه كاين شي واحد تيبغي لولادو المضرة والهلاك؟
- المرأة الثانية: إلا لكانو مساخيط الوالدين
- ولد حادة لهبيلة: ورزقكم ورزق ولادكم ما كاين باس إلى ضاع؟
- الرجل الثالث: كفاش ما كاين باس؟
- الرجل الأول: أش هاد الهدرة تتقول يا ولد حادة لهبيلة؟
- المرأة الثانية: أش باقين تتسناو؟
- المرأة الأولى: إوا ها الرجالة ديال بصح ولا حيد عليا لهيه
- الرجل الثاني: شحال هدي كان علينا نفكرو في هادشي
- ولد حادة لهبيلة: شكون لي قال لنا بلي سعادة الحاكم عارف أش كيدير الفيل ديالو؟.. يالله أسيادنا بسم الله
- الرجل الثالث: يا ربي لما خرج هاد نهار بخير
- الرجل الأول: غير نديروها في يد الله وصافي.. وما القضية حامضة بزاف
- ولد حادة لهبيلة: شفتكم باقين تتزيدو رجل، وتوخرو الثانية
- الرجل الثالث: زيد انت
- الرجل الثاني: لا زيد انت
- الرجل الثالث: والله ما نتقدم قدامك
- المرأة الأولى: واش ما بقات رجلة؟
- المرأة الثانية: واش ما بقات نخوة؟
- الرجل الأول: سكتو يا هاد لعيالات.. اللقوة نشاع الله
- ولد حادة لهبيلة: راه ما قدامنا حتى حل إلا نتجمعو كاملين.. رجال وعيالات، ونقصدو باب سعادة الحاكم
- الرجل الثاني: والمقصود الله سبحانه
(مقطع غنائي)
وانت هدر وتكلم ××× لاش يصلح داك الفم
واصلة لك حتى لعظم ××× وما قادر حتى تبركم
غ شد راسك وتخمم ××× الله يلعن لما يحشم
كفاش باغي عليك الظلم ××× يزول ويفوت زمان الهم
حالتك واعرة ما تفهم ××× وما تعجب حتى لبكم
المشهد السابع
- حمادي الرابوز: (يظهر) باع.. باع (يختفي)
- ولد حادة لهبيلة: را القضية ساهلة بزاف بحال شريب أتاي نهار وما طال..
- الرجل الثالث: ورا حتى أتاي ما بقاش ساهل أولد حادة لهبيلة.. واش عرفت شحال ولى داير السكر داب ولا لا؟
- ولد حادة لهبيلة: خصنا غير نتنظمو، وتكون عندنا كلمة وحدة
- الرجل الأول: وعلاش ما تمشيش غير انت وتقول له هاد الكلمة؟ ياك هي غير وحدة، علاش غادي نتحماو عليها حنا كاملين؟
- ولد حادة لهبيلة: قد ما كنا بزاف قد ما مزيان
- الرجل الثاني: وا انت يا ولد حادة لهبيلة تتزين وتخيب غ راسك
- ولد حادة لهبيلة: سمعو.. انتما غاديين تشدو غير لمعاودة وتبداو تقولو: الفيل نعم أس، وأنا غادي نشد السرابة كلها. خصكم غ تحميو ليا الطرح وتهيجوني ونا غادي نبدا نْبَرْبَطْ فوق العود، وملي غادي نسخن غادي نبدا نسرب شي تسراب فين يبان الكلليوس قدامي: فعل وترك وما خلا حد يبرك.. ها ما دار ودار، وما خلانا عليه في التقار. يالله ندربو عليها داب باش ملي نوصلو لعند سعادة الحاكم، ونوقفو قدامو هكدا بحال راجل واحد، نكونو سالخينها سليخ.. يالله تقادو بعدا.. وانتما زيدو للقدام أ الرجالة؟ علاش تتخزنو ورا لعيالات.. واحنا مازالين هنا؟ إوا ملي نمشيو لهيه.. أش غاديين ديرو؟
- الرجل الثالث: ورا لعيالات خصهم يكونو هم اللولات
- الرجل الثاني: را زمان لعيالات هدا
- الرجل الأول: علاه ما في راسكش أش قالت اليوم لالة المدونة، وخلاتنا حالين فامنا؟
- ولد حادة لهبيلة: يالله زيدو لقدام هنا، وحلو فاكم نشوف أش غاديين تقولو..
- المرأة الولى: غزات فيكم.. إوا موتو بلفقصة
- المرأة الثانية: غادية نموت داب ونا مرتاحة.. الله أودي كنتو قاهرينا من يام بونا آدم
- الرجل الثاني: القهرة هي لي ولينا فيها داب حنا معاكم..
- الرجل الثالث: حنا وخ هكاك را حن منكم
- ولد حادة لهبيلة: بارك عليا من هاد الهدرة الخاوية، وزيدو لقدام هنا، وتقادو، (للرجل الثالث) وا حدر ظهرك انت شوي وتمسكن.. علاش مْعَرَّشْ هكدا بحال الفلوس؟ واش باغي تناقب.. كلكم خرجو كعاببكم، وحدرو خناششكم، وتمسكنو.. يالله أ لعيالات نتما خليو عينيكم يغرغرو بدموع.. باين ليا بلا ما نمشيو حسن
- الرجل الأول: داك شي لي كاين..
- الرجل الثالث: يالله أسيدي فرقو علينا هاد جقولة..
- الرجل الثاني: وكل واحد يمشي يقضي حاجة لراسو
- ولد حادة لهبيلة: صافي انتما غير على سبة وحيلة.. باغيين غير تمشيو.. خصكم تعرفو را ما بقات عندكم حتى حاجة اخرى تقضيوها حتى تقضيو هدي بعدا.. يالله تقادو.. واش غادي نعاود الهدرة من اللول.. ها داب مزيان.. هكدا نبغيكم.. يالله داب غادي تغوتو وتقولو في مرة وحدة: الفيل نعم أس.. لا لا ما شي هكا.. عاودو.. لا لا شكون لي تيخربق، شكون؟ عاودو.. باين ليا غادي طلعو ليا برادي بلا مجمر.. عرفتو أش إجيكم مليح.. غادي تحلو فامكم كاملين ورصاو حتى نعطيكم الإشارة.. مزيان.. مزيان..
المشهد الثامن
- الشاوش: (يظهر وخلفه عودينة) أش هاد الفوضى دايرين نتما هنا؟ ما لكم حالين دراقشكم هكدا؟ ياك ما كاين باس؟ يالله هدرو ما لكم ساكتين؟ ولا راه غادي نخلي دار بوكم واحد واحد.. يالله هدر انت.. يالله هدري انت..
- ولد حادة لهبيلة: لا نعم أس غير كنا بغينا نمشيو عند سعادة الحاكم
- الشاوش: تمشيو عند سعادة الحاكم؟ لاش بغيتو تمشيو عندو؟
- ولد حادة لهبيلة: غير بغينا نمشيو عندو نقولو له..
- الشاوش: أش بغيتو تقولو له؟ داكشي لي باغيين تقولو له قولوه ليا أنا هنا.. ونا غادي نوصلو له.. واش سعادة الحاكم ما عندو شغل بحالكم؟
- ولد حادة لهبيلة: لا غير الفيل..
- الشاوش: الفيل.. مالو؟
- حمادي الرابوز: (يظهر) باع.. باع (يختفي)
- الرجل الأول: ياك قلت لكم القضية حامضة وما سمعتوش ليا.. هدا غ الشاوش وشوف أش دار.. ما حسبلاك كون لحقنا عند سعادة الحاكم
- الشاوش: الفيل مالو؟
- الرجل الثاني: وافينكم أ لعيالات؟ إوا هدرو صافي تقضاو لكم
- الشاوش: الفيل مالو؟
- المرأة الثانية: هدرو الرجالة شلاغمية بعدا.. ما بقى غ حنا لعيالات؟
- المرأة الأولى: فين هما الرجالة حتى انت، الله يجيبك وديك على خير؟
- الشاوش: الفيل مالو؟
- ولد حادة لهبيلة: لا غير ما عجبناش حالو؟
- الشاوش: الفيل مالو؟ مال حالو؟
- ولد حادة لهبيلة: شفناه بدا تيرزم وينقص في حالتو.. قلنا واقيلا لحرامية ديال الوحدانية معدباه مسكين ومرتاه
- الشاوش: إييه ومن بعد؟
- ولد حادة لهبيلة: اتفقنا جميع.. وقلنا نمشيو عند سعادة الحاكم نقولو له يدبر للفيل على شي فيلة زوينة تونسو، وتخليه يرجع كيف ما كان بوكوس، تيحسن بلا موس
- الشاوش: أش ظهر لك أعودينة؟
- عودينة: والله إلى فكرة جوينة.. جوينة بجاف (يضحك)
- الشاوش: (لعودينة) سكت.. (لولد حادة لهبيلة) مزيان.. مزيان.. فكرة معتبرة هدي، غادي نمشي داب نقولها لسعادة الحاكم.. وانت من داب راك هو لي غادي تبقى تضرب الغيطة، وعودينة غادي يشد معاك الميزان (يختفي)
- عودينة: أش من ميجان نعم أس؟ (يتبعه)
- ولد حادة لهبيلة: ونا أش عرفني في ضريب الغيطة نعم أس؟ (يتبعه)
المشهد التاسع
- الرجل الثالث: (لولد حادة لهبيلة) ياك قلت لك بلي تيدخلوه وخرجوه بطبل والغيطة، وما تيقتنيش.. وها انت داب غادي تولي غياط بلا خبار ولد حمو
- ولد حادة لهبيلة: (يظهر) ياك قلت لكم والله ما ديرو شي نبقة
- حمادي الرابوز: (يظهر) باع.. باع
- ولد حادة لهبيلة: سير بعبع عليا لهيه في التساع (يختفي وهو يدفع حمادي الرابوز خارجا)
- المرأة الثانية: ما كفانا فيل
- المرأة الأولى: زادونا فيلة
- المرأة الثانية: واعلم الله شحال غادي يولدو من فيال
- المرأة الأولى: وتسلطو علينا من مصايب وهوال
- المرأة الثانية: بلحق هدا هو سرنا
- المرأة الأولى: حنا لي سادين فامنا
المشهد العاشر
(يتم إلقاء كلمة "باع" بشكل صدى متخافت لعدة مرات)
- حمادي الرابوز: (يظهر) باع
- الرجل الأول: باع
- المرأة الأولى: باع
- الرجل الثاني: باع
- الرجل الثالث: باع
- المرأة الثانية: باع
(ثم يتم إلقاؤها على شكل مندبة متكررة، ينتهي بها المشهد)
- حمادي الرابوز: باع.. باع
- المجموعة: باع.. باع
(يختفون جميعا من أماكن مختلفة)
(انتهت)
