رْكَبْـتْ عْلَى عَــوْدِي

رْكَبْـتْ عْلَى عَــوْدِي

طَلْعَــــتْ ٱلشَّمْــسْ وُعْلِيَّ بَرْقَــتْ
وُوْضَـــاحْ وُبــانْ لِـــيَ ٱلنْهـارْ
هَكـْـذا ٱلأقْـــدارْ هِـــيَ حَكْمَـتْ
وُلَمَّـــنْ تَحْكِـــي هـــاذْ لَسْـرارْ

تْشَمّـرْت وَتْحَزَّمْـتْ كيــفْ ٱلرْجَــالْ
وَنْسـاتْ نَفْســي كُـــــلْ لَهْمــومْ
ٱلْحَمْـــلْ عْلِــــــيَّ زادَ وُثْقـالْ
وَالْقَلْـــبْ يَبْكـــــي مَضْيــــومْ

وُفيـنْ عَــــوْدي ٱللّـى مْسَـــرَّجْ؟
مَرْبــوطْ يْحَنْحَـــنْ وْرَا لَخْيـــامْ
يَتْرَنَّـــحْ، وُبلْجامُـــو يَتْهَجَّـــجْ
وُكيــفْ نَرْبَــطْ لِيــهْ لَحْـــزامْ؟

رْكَبْــــتْ عْلَـــى ظْهَـــرْ عَــوْدِي
مْهاجَـــرْ بـحُــزْنْ نَــاسْ لَبْـــلاَدْ
تَارَكْ أصْلِـــي وُقْصَـــرْ أجْــدادِي
فيـنْ ٱلاَهْـــــلْ وُمَلْعَـــبْ لَوْلاَدْ؟

راحَـلْ باغِــي نْحَقَّـــقْ ٱلْمُــرادْ
وُكيفْ تْحَقَّـــقْ كُـــــلْ لَحْـــلامْ؟
مَا بْقـا قَوْلــي عَنْدْكُــمْ جـــادْ
وُصْعابَــــتْ عْلِـيَّ مْحَايـْــنْ لَيّامْ

شْكـونْ يْصـَــــدَّقْ لِـــيَ ٱلْحــالْ
غَــادي بقَلــبْ جامَــدْ وُشَجْعــانْ
شْكُـونْ قَــادَرْ يْرَيَّــــحْ ٱلْبَـالْ؟
وُدارَتْ بــيَ شَـــلاّ مَـــنْ أحْـزَانْ

وَالطْريقْ كُلْهـا فْيَافِـي وُأخْطَــارْ
شَوْكْهـا مْنَـــوَّعْ وُسَمُّـــو قاطَــعْ
وَاللْفَاعْ غْريبـَـة لْسونْهـَـا نـارْ
كيــفْ نَمْشـــي وَنْــوي نَرْجَـــعْ؟

قـادَرْ نْوَاجَــهْ كُــــلْ ٱلثْعَابَـنْ
وَنْشَـــرَبْ كْثيــرْ مَــــنْ سَمْهَــا
بـحْياتــي رانِـي غَــادي راهَـــنِْ
وَالطْريـقْ غْريبـَــة ما نَعْرَفْهَــا

حَظّــي هَكْــذَا هُــــوَ مَكْتـــوبْ
وَالصْبَـــرْ بْعيــدْ عْلِــيَّ كْثيــرْ
كُنْــتْ للَدّنْيـَــا ديمَــا مَحْبــوبْ
وُمَــا فَهْمَــــتْ قْلــوبْ ٱلْغَيْــرْ

وُلَحْظَـة عْثَــرْ بـــيَ ٱلْعَـــوْدْ
وُتَرْمَيْــــتْ فَـــوْقْ ذاكْ ٱلشُّــوكْ
لاَ حــدْ فَ مْكانِــــــي مَوْجُــودْ
وُبَيْــنْ نْيــابْ لَحْنـاشْ مَتْــروكْ

عْشَقْــتْ حُــــبْ ٱلْمَــوْتْ بالَمْهَـلْ
وَالدّنْيا غــادَة تَجْــري زَرْبانـة
ٱلاَرْضْ كُلْهــــا لِلنْـــوسْ فْضَـــلْ
لَكِـنْ ٱلْهمََّـــة غَــادة هَرْبانَــة

ٱلْقَلْـبْ تْقَطَّــعْ شَـــــلاّ أطْـرافْ
وَانْتَهَـى زْمـانْ ٱلْعَشْـرَة وَالْحُــبْ
مَـــنْ ٱلْمَـــا ٱلْقَلْــــبْ خَــافْ
وُمـَــنْ ٱلسَّــمْ بْغـــا يَشْـــرَبْ

نص زجلي يعتمد على إيقاع التقفية
تحياتي لك

حميد يوسفي كتب:: نص زجلي يعتمد على إيقاع التقفية

تحياتي لك

أخي حميد يوسفي
مرورك أسعدني كثيرا
تقبل سلامي الحار