كية المقهور يخدم في تمارة
كية المحكور يشرب كيسان مرارة
كية المدعور يتحرق بشرارة
كية المضرور يغمض عينيه خسارة
كان يخدم يردم
وسط الزوبيا
يقلب على لقمة الحلال
أوكانت تدمر تصبر
تسمح في حقها
على ود حفنة مال
ما تحاسب في أعمال
ما تتقيد بآجال
كشوكة حمار نابتة
في طرقان منسية
كشجرة الصبار فالتة
من صحرا معمية
كحمار الناعورة خدام بجدريال
كشجار المعمورة واقفة بلا سؤال
أوكان لي كان
في نهار مشؤوم
لسون عافية غدارة
ماتفرق بين نسا ورجال
ماتفلت شيوخ وأطفال
كلشي عندها بحال بحال
أخرتو رماد عصارة
تدوز على الخضر واليابس
تسوك رواح محتارة
تخنق أحلام تعدم فرحة
تولد ندم تنبت جرحة
وأهوال نابعة من نفس أمارة
همها سم قتال
كالعقرب يضرب بمهارة
همها تكدس أموال
من ليعة المسكين
تعمر شكارة
آه على الدرويش
وصعاب العيش
وفي آخر المطاف
يتحرق بنار مشرارة
وإلا كتاب يعيش
مايقدر يعيش
يدوز يومو محال
معني بزاد الصبارة
آه ياما
نرثيو الحال
وآخرالمآل
في كل مساء وصباح
في كل مجية ورواح
لنفوس الطاهرة
الراقدة في عروق المقبرة
نرثيو جراح
في لواح القراح
لي مات رتاح
ولي عاش عمارة
