فين أنا ..؟

إخواني السلام عليكم .دعوني أبدأ معكم بآخر ما كتبت وهي زجلية أملتها بعض الظروف الخاصةأرجو أن يروقكم مستواها :

فين أنا ..؟؟؟

مال النهار ليلْ دْياجيه حالـْكه ؟
يصبّ ْالظلام ف القلوب
التخمامْ لجامْ ..ألهمومْ بارْكه
داك الشروق صْبح غروبْ
العقل تالفْ
العمر هارفْ
ألبير عامر ب حْجور مْهالـْكه
شفت الورد ذبال
أالربيع حالـُه يختال
شفت دم لـَجروحْ شْعابُه سالـْكه

الجّـبَّاد عليّ جْـبّادْ
أتـفرْكـَه من خيرة ْ لـَعْواد
الحْجر عليّ هوّادْ
بالحق ڭالو : المكتوب ماليه هروبْ
كثرة لصحاب مْناحيس
هاد الحْلام كـْوابيس
أحتى الطرقان مْتاريس
قبالة الفيلا والقصورْ: أشـْـنو قيمة البرّاكه ؟

فدّان الناس سْبوله تعمَّـرْ العِين
وانا فداني خرْطال عـْمى ليه الزين
لي شاف ب المحبّة والدين
إڭول مَ الصّابْ لـَيّامْ تقاضى ف الحينْ
الخد الحْمَـر يزيّن شي وحْـدين
القلب الضاحك ف صْدر شي بعضينْ
والجّيب العامر مفيّـك هدوك خـْرين
وانا قلبي قلب اليتيمْ والعـْمى والحرّاڭـه

ڭالو ضحكْ أخويا وتبسّـمْ
راهْ شي عندو طونْ أشِي بْ كيلو مْسلـَّم
حْكـّم عقلك لا تكـلـّم
ڭـلت راه الجُو بالدوامْ مغـيّمْ
أهداك البو لي من مده يتألم ؟
خليوني نصارحْ ذاتي أما نتوهّمْ
راه لي بحالي: ڭرْدفـو الـْخمْرَه والصّاكه

فين انا يا الخوت وفينكم نتومه ؟
ماحيلتي ف السّوسه تنخر اللحمْ ألعْضومَه..
ماحيلتي فْ لـِيد لي تبانْ مَعْدومه..
ألا فينْ حقي من اللذه المعـْلومه؟
ماحيلتي ف الريشة لي حْروفها مثـْـلومَه..
كيف المنبوذ أسيادي ف حْقول ملغومه
نفرك أنتـّـفرَك كيف الفرّاكه[/size]

يصعب علي الرد على هذا السيل العارم من الكلمات المصصفة بشكل مميز

خاطرة مؤثرة تعكس لنا صفاء ذهنك ودقة حرفك في التأثير على احاسيسنا
سلمت اناملك على ماذرفت