الديمقراطيه
ڭالو هادا زمان الديمقراطيـه
طلقْ اللسانْ !
الحق : عضْ عليه ب السنانْ
الحُب ما بـْقى عيبْ
سعـْداتْ الـولهان
ڭالو هادا زمان الحريَه
حمدت الواحدْ المنانْ
لي ما بقات عـبوديَّه
فرحْ يا داكْ الإنسان
عِش فـنانْ
كنْ فرحان
عْطي البرهان
ما بقاتْ زبونيه
فرحتْ يا ناس الخيرْ
ما بقيتْ خايفْ
أنڭول آش نديرْ ؟
ما نطلي الحق بَ الجيرْ
ساعَه وْلاد الخيرْ ألخمير
صْحاب الحضْـره والعقل التالفْ
ڭالو بغيتي الطـِّيرْ
دختْ ..مابقيتْ عارفْ
لقيت راسي ف البيرْ
الديمقراطية رجعات صابونيَّه
الديمقراطيه غـَربيه
ماشي عرْبـيـَّه
لهيهْ تربَّى ب الشويَّه
هـْنا ب الدفـونيه
مشتاق ليك يا زينة السميّه
هناك بنادم عارفْ
هْـمَّه ونـْصاف
هنا العقل شارف
الحضْـيه والتـْـفاتـف
الديمقراطيه يا ضو عينيَّه
تمّه طلـْقي الجـَّنحين
الواحد شبعان ألا مسكينْ
هنايا ماكاينْ فين
غيروها شي وحْـدين
الديمقراطيه صبحات جـْنيه
هناك ما كاين تـْْبع
هنا يشيرو ب الصبعْ
اسْمع أسيدي اسـمعْ ..
ياسيادي غابتنا بْـرّيه
تحت كل شجرَه نمرْ ألا سْبع
الحقوق شْباح وهميّه
مول الكرش ياكل ما يشبع
ألمسكين ؟ حـْدو الربع ْ؟
