إفني
سال عليَّ
هاد الضيم الساكن لوراقْ..
وديك السمَا ملِّي تزراقْ..
سال عليَّ
افني لمدينَة
افني لحزينَة
بجراحها تنزفْ..
سال عليَّ
هادْ الطيف لمهيّج مدادِي
لمخبّل ب ركادِي
الطاعن بالخفْ..
سال عليَّ
******
هنا
شفت الدزيرة بابْ
ولمغارة عتبَة
هنا
تخلط تيهان لبارحْ
ب رماد الكتبَة
هنا
عْواج السطر
بين نور وظلمَة
سبابُو حلمَة
سبابُو كلمَة
ماتت ف نهارهَا
تحد عمرْهَا..
وقبل ما يجيب حد خبارهَا
هاج بحْر ليَّام
ب مَاه وغمرْهَا..
******
مدّيت يْد
مدّيت ليدِّين بجُوجْ
وسّعت لخوية بين
السْطر والسطر
ودلِّيت ركبة فهامتي
شفت(افني) على كدْهَا..
خضرة..عذرا
وجبال و بحُور تحدْهَا..
وشكون يكول يشدْهَا..
ويداوي لجراحْ...
وشحَال مْن كلام يقدْهَا..
يواسي فْ اللِّي راحْ...
******
التِّيه يهدّْم الركيزة
والحِيرة تورّث وسواسْ..
(افني) واخا عزيزة
نديرك بين جُوج قواسْ..
حْتى تتحْز هاد الضبرة
ونبرا من حركَة لهواسْ..
******
نجيكْ نلقاك حمَامَة...
بانية عشها فُوق سْوار الدَّاتْ..
موسدة جْبل
فوق كتافُو غمَامَة...
نِيران الحكرة فْ جنابك كدَاتْ..
تجِيني تلقايْني
ف بير النّشوَة
تطلِّي عليَّ
نزيد نتنشوَا
سْوا غالبة..سْوا مغلُوبة
صُورتك فْ لمَا
نشوفها مقلُوبة
نتعدب بيها..هيَّ وليَّام...
******
نختارك
نبايعك
بمْداد روحِي..
بقْصايْد جروحِي..
بلكلام الخارج منِّي
بالسكات السَّاكنْ فيَّ
نكتم تصْياح القلب
بين ضلوعِي..
نهز قلوعِي..
ونكدم موج ليَّامْ...
******
محرزك عْ لبحر
سُور و قبَّة..
محرزني عليك
عار وسبَّة..
محرزك عليَّ سر
واخَّا يتخبَّى..
لازم تكشفُو ليَّامْ...
