الكسول
ما خديتش لقراية بالمعقول
يا الناس راني كسول
ما نقرا برا ما نعرف آش نقول
راني اليوم ما قاريش
إوا خرجت انا من لقراية
أو خديت مانطة او ملاية
التيليكومونض حداية
حيت انا ما قريش
نتفرج في طوم او دجيري
أو السندباد كيف يقول ليسمينة شيري
ما دزوجي ما تشوفي غيري
يا الناس راني ما قاريش
كبرت او زادني صضاع الراس
الواليد خدّام ترّاس
الوليدة ما تفيّقني من النعاس
حيت انا ما قريش
تمّ دخلني الوسواس
قلت لازم نخدم بحال الناس
أُو نحمل شي بالة و فاس
حيت انا ما قاريش
خرجت للدنيا او بغيت نعيش
قلت نخدم او نربّي الرّيش
بالطونوبيل مع لحمام نطيش
و لكن راني ما قريش
إو بركت شاد من راسي أو نخمم
بان لي دايز ولد لمقدم
بالكاوكوة او السِّكار في الفم
وا خّى حتى هو ما قريش
إو قلت مع راسي كيفاش دار
سولت مول الحانوت او الخضّار
إو جابو لي عليه شلاّ خبار
وا خّى حتّى هو ما قاريش
قالوا لي راه حرق لطّاليان
خدّام ينكس للتّيران
أو في الليل يبات معنق الفيران
حيت ما قريش
إو مشيت رجعت لفراشي
نخمم في اللي قال لي العيّاشي
حتّى غيبت او ما تسدّو رماشي
حيت انا ما قاريش
إو بديت نشوف في السقف
أو هي الدّير في راسي الطّف
غا نسلت في شي رموك بالخف
حيت انا ما قريش
مشيت نتسنّى في البُّور
حتى بان لي غيطلع للبابّور
طلعت دّرّقت حدا المونتيسور
حيت انا ما قريش
دخلنا لفرنسا على لبحر
مدينة كلها حيوط ما فيها حجر
الناس تتكلم وانا ننضر
حيت راني ما قريش
إوا قلت نعمل زيزون
نمسح السيارات بالشيفون
و غداية خبز او زيتون
حيت ما قريش
شدّاتني واحد الجمعية
وانا عندهم في الويدادية
عا حال فمّي او هوما يسولو فيّا
حيت ما قريش
قالوا شوف هد المسكين
آش من بلاد ضيعت هد الزّين
باينة من وجهو حنين
واخّى ما قريش
بداوْ يعلموني بالرموز
ها لبطاطة ها خيزّو ها الموز
ميل فُّويْ او كعب لغزال باللّوز
واخّى ما قريش
جمعوني مع دوي الاحتيّاجات الخاصة
في الجري عملو لي بلاصة
او دخلوني معهم للمدرسة
حيت انا ما قريش
او علموني نتكلم بالإشارة
او صبحت مشهور في الإدارة
او حملت راية فرانسة في كل دولة جارة
حيت ما قريش
لفلوس دارت في إيدي مزيان
تفكّرت والديّة او الجيران
لكن خفت يعيقوا بيّا العديان
و يعرفوا باللي انا غي ما قاريش
إو قلت نمشي للمغرب توريس
من ولد لبلاد لولد باريس
او السمية شارل لويس
حيت ما قاريش
أو قطعت للمغرب توريس
الكومبلي او لكرافاطة و الستيلو لابّيس
شافوني في الدرب قالوا موحال هدا ولد دريس
حيت حتّى هما ما قارينش
او مشيت لعند والديّة
يعنقوا او ضمّوا فيّا
صوبوا لي لفراش او المانطة تركيّة
حيت حتّى هما ما قارينش
قلت نرتاح شي شوية
غمّضت عيني السقف جا عليّة
جيت ندزحزح طحت من فوق الناموسية
حيت راني ما قاريش
وانا غير كنحلم
او نصحاب راسي طاح علي الردم
او بركت مكمّد و نخمم
آش يدير واحد ما قاريش
إو عاد مشيت فتحت لكتاب
طفيت التلفازة او سدّيت الباب
نخطط بالستيلو او نعيد لحساب
فآش يخدم واحد ما قاريش
ما بغيتهم يقولوا داك الدريويش
خرج عليه ولدو داك الهيش
حيت الناس قرات او هو ما قاريش
اليوم غانقرا مزيان
او نحفض ما في السنة و القرآن
منهم نتعلّم البايان
و يقولوا ولد فلان قرا مزيان واخّا ما خدّامش
رحال اودغوغ
