الطلاق ابغض الحلال
هدا واحد مع والديه كان عايش هاني
يهضر و يتكلم بلا الغاز بلا معاني
واكل شارب ما يخمم لا لكراء لا لطواجن لا لسواني
حياتو كلها ضحك او لعب ما فيها حزاني
قال لازم نتزوج ببنت الناس بحال قراني
تعاون الوليدة في التكناس و غسيل لاواني
مستورة ماهي بحال بنات اليوم في اللباس او تصبر معايا و تعاني
ما تكون تبدر كلشي تعملو بلقياس او تعرف ايمتى تفراني
عقلها كبير ما فيه وسواس و ما تديها في كلام عدياني
قلبي طاح في غرام واحد لبنية
العينين كبار و النيف منقاد او لخدود وردية
الزيف و الحشمة و العينين في الارض مخفية
والديها نعم الاخلاق و نعم التربية
بغيتها في لحلال قلتها لوالدية
دازت ليالي و ايام جبتها لبيت الزوجية
خديت من السعادة شهر او عام او من بعد صبحت قلتي مكفية
عند بالي خديت خيرة لحمام لكن حسبتي خرجت خطية
زاد عندي وليد او لمرا زايدة في التوحام خايفة لا الضيع من ايدية
عند بالها كثرة الاولاد غتزيدني غرام لكن العكس بعدوها عليا
نخمم في كثرت الصير مع كثرت لفام و شكون يحس غيري بهد الوضعية
تسيفت لي لمرا و قالت كلام:طلقني و لا كري ليا
ما نقدر نصبر مع امك شي ايام راه غتقتلني ديك الشيبانية
مشى الحب و مشى لغرام و طلقت ديك الرهبانية
عند القاضي كان لحكام طير لي النعاس من عينية
الحكم كان قاسي و لا في الاحلام و الحبس مشيت لو برجلية
طار الحب و طار نعاسي المدونة خرجت فيا
خمات في لباسهم قبل لباسي و صيرهم صباح و عشية
عند بالهم غيربحوا بي حباسي لكن الخاسر لبلاد او لولاد ضحية
صبحنا عايشين في سوق النخاسي كثروا لعبيد و مشات الحرية
ضاعت حياتي و ضاعوا ناسي و مشات روحي عند مول البرية
ما مولف لا بي حبس لا بي بروك في كراسي و شكون سبابي غير الحياة الزوجية
رحال اودغوغ
