لمرا ...كيف نشوفها

لَمْرا

كيفْ مّا كان أنتِ محْبوبا

أنتِ الباسي ووْناسي

وأنت سعْدي ومكتوبي والمكْتوبا

أنت شواري ف جْلاسي

ب شورْتكْ وريّكْ مطلوبا

أنت رسْمالي وساسي

أنت عيني وانت الاعجوبة

ابلا بيك كيف إكون راسي

وانت أمانا عليا محسوبا

الغالطْ للي إعيش رَواسي

حياتو عادْما معطوبا

أنت مراتي وكياني وإحساسي

الدار ب غيبتكْ منكوبا

أنت طبيبي ف بَاسي

والعيشة بلاكْ مسلوبا

أنت عماما فوق راسي

نذكركْ نوبا نوبا

ف ذاتي حبك أساسي

وفْ مراسمي ومرسم قلبي محجوبا

البوعليوي عبد السلام

الرجل

مراتي
ماتسحاش
ماتعياش
ملّي تفيق
جيب جيب
أر أر
خاصّ خاصّ

لمرا

عييت
ب لحساب
ما نخرج
ما نشوف
حباب

الرّجل

لحساب
أولاّ
ندير يديّ
ف الجياب
ونولّي
شفّار
وكذاب
ولقضيه
تخياب

لمرا

بالصح
لعمده عليّ
حسن التدبير
فيه لبركه
والتيسير
لفلس
واخا يقلال
غير يكون
حـــــــــلال
عليّ
بالصبر
واخّا ندبال

زائر

لخليلة و يا لخليلة

شحال و انا عايش فهد الدنيا من ليلة و يوم
و شحال سهرت الليالي و عيني ما شافت نوم
و شحال من خليلة و خليلة خلات حياتي كلها هموم
اللي نحبها نقول هدي هي حياتي يجي الريح يديها او نبقى انا مغموم
نحكي لها قصة حياتي و شحال انا مظلوم
هي غير كتضحك عليا و انا بيها مغروم
نبات عاس عليها مفرش الضرك و مغطي بالدوم
و شحال من ليالي الناس ناعسة و انا كنعد في النجوم

المرا ضلعة عوجة ما يقد يدريسيها حد في هد الزمان
غير عمل ليها خاطرها الى بغيتي تعيش فامان
سمع كلامها و لا الدير بيه و عنداك يغرك شي انسان
راه يزيدك لي عافيتها و هي ساكنها شيطان
يبقا يوز عليك و يغر فيك بحلاوة اللسان
حتى تعاديها و تهجرها و تخلي ليه لمكان

تم يجي عندها و يقول
انتي حياتي و انتي ودادي
بيك بغيت نكمل ديني او معاك يكونوا اولادي
بالليل نتونس بيك و تكوني سريري و سنادي
او بالنهار انا نخدم عليك او في المساء انتي هي وسادي
هدا هو اللي ضحك عليا و سمع اش يقول لمحررت بلادي
سمع بي كلامها و عطاها حلاوة اللسان او خلاها باسم كتنادي

الى بغيتي تعيش اليوم سعيد سمع كلام لمرا او عطيها كلمة زينة لتقلع اوتادك و اوتادي

رحال اودغوغ

المْـرا يا ناسْ فيها وفيها
فيها بنت الناسْ
فيها الحادڭه ب الشهيواتْ تبغيها
فيها المعڭازه ..تحب النعاسْ
فيها لي تـْعينك بْ دينها
فيها لي غي طيـَّب الراس
فيها المسْرارَه..ربِّي يحْـضيها
فيها مولاة الوسواس الخناسْ
فيها الحـْنينه، تعزها ما تـقدْ عليها
فيها لي ترفسك ترْفاس
فيها المتبرْجه تعـيىَ ما تنهيها
فيها لي ما تكرهْ الكاسْ
فيها الملـْحاحه تعْـيى ما ترْضيها
هادي المّاعنْ.. أهداك لـْباس
فيها المْـرزنه .. تحطك فْ عينها
فيها المفلسه لي تحب الدْحاسْ
فيها الزينْ..لا يغرك زينها
تعذبْ فيك .. طحنكْ بَ ضـْراس
المرا يا ناس فيها وفيها
غير شي من الطوبْ أشي نحاسْ

لَمْـرَا قالـوا أصْلهَا مَـنْ الضْلـــــوعْ

والكبـدة بيـن الضلـــوع ضاويـــــة

وَخـا تظـل من هَـمْ العشرة مخلـوع

العيشـة بــلا مْـرَا طريقهــا خاويــة

ربــي زرع لمحبـــة فـي لقلـــــوب

وزاد ف قلبهــا شــلا سْخـا وْحنــان

لمـرا فيهـا حريـر صافــي وثـــوب

والنوارة الحرة نسيمها فات الجنـان

لمــــرا ستــرة تغطـــي لعيــــــوب

ووردة مفتحـــة تتقاســم لهمـــــــوم

شـوكها يقــدر يخليــك معطـــوب

شـوك .. إمـا شافـــي وإمـا مسمـوم

اركب أو زاد،أو تبعاتو
ملي نزل...
ركبات و زادت ،أو خلاتو...
صرخ :"لمن خليتيني"
قالت ليه:
"فالأول كنت تركبني حداك أو تديني"

عزالدين بابطي