غير بكية على قبر المهدي

هزيت حفنة من ترابك و شميته...ريحة لبلاد و فرحة لولاد بها .ريحة امي ملي نبكي على صدرها ...ريحة بويا ملي يدري حصاده .ريحة لولاد و هما راجعين من الواد .ريحة الحنا منقوشة ...ريحة الزرابي مفروشة .شميت ترابك ف ريحة عودي ف تبوريدة قدامه ...ف ريحة النوالة ف حر القايلة . ف ظل ذيك الشجرة الشاهدة عليك و علي . ف جريد النخل ملي يراري ببلوحه .شميت ترابك ف حرث و حصاد السبولة . ف النخالة ملي تفطمها حبوبها .
شميت ترابك فيَّ ملي قلبك يقساح . ندلي لك عروقي حبل ،يطلعك من حفرة الزمان الماضي.
شميت ترابك ف ضحكة الرهوط ...منفوخة ف بيرو ورا لحيوط . شميت ترابك ريحة ...قطران به نجيف .شميت ريحة ترابك ف كلام الكرسي ...لكلام غير كلام ،ما يعري ما يكسي . ف ذاك لعلام الباكي عليك و علينا ...دموعه دم ...كفن ملي يغطينا نتعراوا بدود ترابك .شميت ريحة ترابك ف ذاك الوجه المشروك ...يندب يغربل و ينكي سيفته من الشقوف .شميت ريحة ترابك ف الدوفيز... ملي يبيع ولاده و يشري حلمة مغلفة باياسهم .
يدلي عناقهم للموج ...موجة للمسكين .و ف هروب لبحر تلقاهم عاضين ف الصبر ...خلاوا ترابك و شدوا ف لحجر .قال يهرب ف دواخله ريحتك ...عرام و قناطر من روايحك على ظهره ، كل ريحة فيها وجهك،يمكن حنين و قاسح .ريش حمامة و ظفار نسر ...حلو و مالح ،ضحكة و تنهيدة ف ظلام لقبر .و هزيت حفنة من ترابك و شميته ...تخلطت روايحك عليَّ... لون طوبك يمكن نسيته ...نادر من روايحك فوق ظهري و ثقلت عليَّ .

كلامي ف لساني تقيل
و الخوف ف دواخلي راكبني
الراس محدور ذليل
الحيط عالي حابسني

قشرت الخلعة في
و الحرف لمنفوخ عريته
قبور هي و منسية
الا نساني انا ما نسيته

دخلت للروضة نقلب عليك
قبرك يا المهدي فين نلقاه؟
قبر بقبر نسول عليك
زين الضحكة شكون لي خداه؟

تعريتي يا المهدي
و قلتِ:تدفينا
الخوف فينا كيسدِّي
خديتي من عمرك باش تعطينا

المهدي مدفون فينا
و بسكاتنا كفناه
مشينا ف الدنيا و نسينا
و مات الحق معاه

كفن غريب
ف روضة مهجورة
طريقها ما تدي ما تجيب
سولوا ذوك النسورة

عييت نقلب و نفتش
هداتني ذيك الطريق
لا قبر لقيت و لا نعش
توصلني لذاك الرفيق

مات المهدي فينا
و الرفاق ف رحبة الدياب دفنوه
لا حفرة لا يد حنينة
ما تغسل المهدي ما كفنوه

و غير سير يا المهدي
و ما تلفت وراك
الجمر الكارح مازال يقدي
و الطير الحر طار معاك

فين رقادك يا المهدي
يمكن بين لرض و السما
حتى ف موتك يا المهدي
شانك عالي كله همة

حفرت لك بسكاتي قبر
و حروفي ف دواخلي تنوح
فمي مخيط ما تكلم ما هضر
لعمالة في لونها مفضوح

حفرت لك ف قلبي قبر
و جيتك اليوم نزور
غلباتني الدمعة سالت جمر
فين نلقى قبرك بين لقبور

كلامنا عرى و مفضوح
و مدادنا ع لوراق باهت
الفم مخيط مكروح
و اللسان فينا ساكت

شكون فيكم يعلمني نقرا
يعلمني نتهجى ف رحبة الديب
شكون يعطيني حروف من نقرة
نفيق بها لساني ملي يغيب

شكون فيكم يدز الخلعة في
و يمضي لي الناب
شكون يعطيني مْرِيَّا
نشوف لساني لي ذاب

يا المهدي يا لمسافر فينا
ذيك العرفة باعت الخيل
ركباتنا الدنيا و نسينا
ما قداتنا فيلة زدنا حتى الفيل .

يسكننا كثير من الألم والأسف كلما أخذتنا الذكرى لزمن ولى برجاله الموشومة أسماؤهم في الذاكرة...أسماء طبعت تاريخ هذا البلد الحبيب تاريخ من نوع خاص جدا كتب بتضحيات الرجال وبدمائهم التي لم تجد منا وفاء إلا الصمت والخنوع...لك كل المحبة والتقدير أخي علي مفتاح على ....

الاخ العزيز علي مفتاح الخير

والله ياأخي وبدون مجاملة ارتاح الى كتابتك اجد فيها الصدق وتنبع من موهوب بدون تصنع
مودتي

الصديق العزيز علي مفتاح

كلما قرأت زجليتك الجميلة هاته، إلا وأعدت قراءتها لأكتشف معاني عباراتها القوية أكثر فأكثر.
مزيد من التألق والإبداع بحول الله

مع تحياتي الخالصة

نص بدلالاته يعيدنا إلى سنوات تتسم بروح الوطنية العميقة

شكرا سي علي

موضوع: رد الأحد نوفمبر 22, 2009 1:09 am

المبدع الشاعر
علي مفتاح

"
هو الوطن
وزمن الرصاص
المحنة
ضريبة وخلاص
غياب المهدي
ناقوس
يفيق وهام الناس
باقي السفينة ما
رسات خلاص
وباقي حب لبلاد
وسواس
اللي تبنا بلا ساس
فكل عجاجة يتساس"
مقطع مرتجل للحظة التي قرأـ قصيدتك، ولم يسبق لي ان قمت بهذا التمرين في كتاباتي.
شكرا أخرجت في بوحك ، مني الكلمات

الأخ علي مفتاح

قصيدتك تحيلنا إلى قضية لازال الغموض يكتنفها، صيغت بأسلوب متميز، يساءل الواقع بمرارة ساخرة عن ظروف و ملابسات اختفاء أحد رجالات هذا الوطن.
بكاؤك، أخي، ليس فقط على قبر المهدي، بل أيضا على الحقيقة التي أريدَ لها أن تدفن في مقبرة الصمت. شكرا لك
أخوك أحمد

» بتنسيق بين جمعية البلاغ و مؤسسة المهدي بنعبود للدراسات والأب
» 8 مارس غادي يدوز...برصاصة ...عفوا...بعدسة محمد المهدي السقال