سمع ..سمع يا القاري
سمع و شوف خباري
شوف فالبلاد اشطاري
سبع بنات و زوج دراري
ولولية بالعاشر تراري
والدار غار...
حفرة من الحفاري
قاسمها انا و جاري
وواحد كاري
تطيح مخدتي ليه...
فوق السداري
عندي ملحتو ...
وعندو بزاري
يلا فكرت...
يسمع افكاري
ساتر عيبو...
وهو ساتر عاري
نسمعو علحوت كواري
علكسكسو
مول سبع خضاري
نسمعو علقصاع و القصاري
المهم جرح الجوع باري
كيساني و كيسان جاري
يلا فرقتوهم..ها خطاري
حتى مشوتصاحب مع فاري
بيت لما بالسربيس و النماري
شي ينعس و شي يبات ساري
الحاصول...
الزلطة منفضة داري
طالب معاشو ما بايع ما شاري
مني لحمار ومني الشواري
وبالليل ندندن بوتاري
***
تعجبت من الساكن فقصر بسواري
تقول قيصارية الحفاري
رافد الهم و يقول اناري
ونازلة عليه سبع قداري
سبحانك يا الباري
سبحانك يا الباري
