حسبت ذنوبي نزلت دموعي
حطيت راسي على المسند
كّـلت نرتاح و نركّد
تكيت سرت نشهد
كّـلت نبات ما نصبح
تصفحت كتابي يا العالي
ما لقيت ما يفرح
ميزاني ما مساوي
القلب خاب ظنو وتجرح
ما ليا عمل غير داوي
في الدنيا نمرح
غير تابع هبالي
عايش جايل سايح
فتني هذ العالم الفاني
تخيلت راسي ناجح
خنجري في يدي
في راسي دابح
ما لقيت لي ينور طريقي
باش قلبي يتشرح
تبدل حالي تغيرت حوالي
سؤال على نفسي تطرح
آش غادي نكّـول يوم ملقاك يا العالي
لمن نوضح و نشرح
آش درت في طول أيامي
كنت غير في راسي نمدح
حسبت ذنوبي نزلت دموعي
شحال كّدني في عيني نمسح
كنت تايه غير في دروبي
لا صديق مومن ينصح
لي رافقتهم زاد عيوبي
شكون لأمري يصلح
ما خفت منك يا مولا روحي
خفت سري يتفضح
كثر وسخي ما لقيت لي ينقيني
ملي كنت في الخطيئة نسبح
مشا ليلي وجا نهاري
بدات الصورة توضح
لله يا العالي لا تاخدني
مهلني لصلاة الصبح
نركع نبكي في سجودي
نترجاك ليا تسمح
في قرآنك نلقى وجودي
بنهار وليل ليك نسبح
الزجال
سعيد محمودي
