ندمت وكبرت
كون عرفنا الحال
غادي يكون هو الحال
هكدا عيان
كون شلا ما درنا
كون بقينا صبيان
كاع ما كبرنا
ليام تكركبات
رويضة بلا فران
وحنا بقينا
كيف بدينا
لمخير فينا عريان
كون عرفنا
كون شلا ما كان
كبرنا وتكلخنا
عقنا ما عقنا
ما فقنا مزيان
دوخة الوقت شادانا
حاضيين راس الشهر
والماكانة
/ عايشين
عيشة الدبانة
فالبطانة /
كون عرفت
أشغايوقع
بعد التسعينات
كون تكمشت
وحماقيت فالسبعينات
للي عاقو وصلو
عضو بسنانهوم البانانة
لا حو لقشور
زلقتي انت
زلق لاخور
زلقت أنا
لاحد منهوم ودا
لا شفار دخل للزنزانة
كون عرفنا
كون شلا ما درنا
حتى حنا بحال لخوت
كون زربنا وهرفنا ...
ندمت وكبرت
كون بقيت صغير
فالمدرسة التبرويل
وفالزنقة التكركير
وفالسليت الخير ..كل الخير
كون راني دابا مرتاح
لاهم حامل لا تفكير
كون راني مستشار
أو نائب
أو كاع وزير
كون عرفنا الحال
غادي يكون هو الحال
كون هربنا من صحاب الوقت
كون حرقنا فالغفلة
هدا شحال ..
محمد بلغازي
