شي كليمات
يا اللي كساتو جريد نخلة
لازم و لازم يضهر عريان
يا اللي قوتو من غار نملة
ما يحلم فيوم يبات شبعان
يا الطالق لسانو واد وحملة
فكر نهار نهيش الديدان
مهما تتقول فالعباد بالجملة
يجي يومك وتتنغلق البيبان
ونافخ الكير ما يسلم من علة
يكوي من يقرب و يوسخ الحيطان
وإلى طار الفروج فاللأرض يطيح
يسكت ويسكت وفالصبح يصيح
ينطق كليمات وبلسان فصيح
الفجر لاح ياغافل فيق
الخوخة ما تطرح الرمان
العافية ماتشعل بلا دخان
والمعنى واضح لكل عيان
غير اللي مابغى يفيق
هادا مزيود بهمو
وهادا من السوق شراه
وهادا مطمر قمحو
وهادا يا ليعتو فين لقاه
هادا من حاداه يضرو
واللبيب يرحم من قراه
و اللي باع اليوم قردو
غدا يضحك على من شراه
