معلمتي لعزيزة
هذي حكاية معلمتي في فترة الثمانين
كنا اطفال وحولتنا لجيش من المحاربين
ماشي بالجد او التربية او حتي التعليم
سلحاتنا بافكار وعلمتنا اعمال قريبة لشياطين
قتلات فينا الطفولة والبراءة وكنا ليها جميع طايعين
رباتنا نخليو العين عليها حالين
الخوف منها كان كبير حيت بيدها العقاب لينا كاملين
معلمتي لعزيزة...........؟
معلمتي لعزيزة لتلميذات الفصل قسمات
وزعات علينا المهام وتصرفات فينا كيف بغات
سعيدة لكبيرة فينا علي راجلها عسات
فين مشا ومنين جا هي ديما وراه لبدات
من القلعة الراشية حتي المرس ليه تبعات
الدار الي ذخل ليها في ذاكرتها ترسمات
رشيدة الحادكة لدار رسلات
تصبن وتخمل وتكمل الطياب اللي ليه بدات
خذامة بدون اجر حيت في قسم معلمتي توجدات
ثورية القافزة الناضية للمارشي بعثات
تقلب علي المشماش ليه معلمتي اليوم تشهات
معلمتي لعزيزة........؟
معلمتي لعزيزة انا لحراسة المديرة عزلات
في اخر الصف وحدا السرجم كاميرا انا توضعات
نراقب ونخبرها واش قريبة من القسم ولا بعدات
مايلزمني نصدر صوت
علمتني تقنية الاخبار غير بحركات
والي استعصي الامر عليا نجمع الوقفة
وهذي اشارة علي ان المديرة من قسمنا قربات
معلمتي لعزيزة........؟
معلمتي لعزيزة للامانة خانت
الكل يتفانا في عملوا وهي قمة اللاظمير كانت
لينا لابائنا للتعليم خانت معلمتي اللي في الثمانينيات هكذا كانت