الصف والنوبة

شديت الصف والنوبة
بحالي بحال الناس
علامة وكرطون وطوبة
وبايت عليهم عساس
صاحبي البرد،
ولوهام عليا مكتوبة
وضروني لضراس
ما لگيت كاس يفش
ولا حرف يحس
ولا حتى خيرت لوناس
وتلف لي لحساب
وما لگيت جواب
وسولت
واش لهروب هو لخلاص
وطالت ليام،
والليالي عليا محسوبة
عيني جاحظة وطار النعاس
ما بان لي صف وما بانت لي نوبة
و قريب نقطع لياس

شكون يشهد اليوم
النوبة ضرسة
والضروس طاحت فالسوم
لا النقرة تغلف
ولا الذهب يفش اللوم
لا لمواج تهدا
ولا حتى حروف الروم
هنا وهناك
الطيور طارت واضحك البوم

ياك الطوبة كانت حجرة
رشاتها ليام وبقات غير الحسرة
عنگتها وبكيتها دموع زرة
حروف هاذ الراس

والعلامة طوق
علقوها بجناب السوق
وبرح البوق
تلف لعبار وانسى لقياس
الطبلة عامرة مفروق
من الفوق بالعلالي
ومن لتحت فاض الكاس
---
نهار الصبر غلبني
جمعت الوقفة
وگلت براكة عليا من لگلاس
راه الكرطون ارشى
والطوبة دمعة
والعلامة غير الوسواس