صفية...

صْفِيَّة

صْفِيَّة
شَدِّي رْمُوشْ عَيْنِيكْ
دَگُّونِي فْگَلْبِي
تْبَسَّمْ دَمِّي
عْلَى حْرُوفْ زِينَكْ
لاَلَّة
العَشْقْ فَرَّقْ غَلَّتُه مْحَبَّة ... سْلاَمْ

صْفَيَّة ظُفْرِي سَالْفَكْ
وَگَيّْدِي هْوَالِي فَخَطْوَاتَكْ
تْخَبَّلْ شُوفِي
وَتْكَبَّلْ خُوفِي
بْرِيقُ فِسْمِيَّتْكْ
لاَلَّة
الزِّينْ عْطِيَّةْ اللهْ ... مْقَامْ

رَانِي فْغْرَامَكْ
كِيفْ الصِّيفْ فْحَرُّ
بْلا ظَلّْ يَشْرَقْ وَيَغْرَبْ
رَانِي فِزِينَكْ
كِيفْ لخَرِيفْ فْرِيَاحُ
بَرْدْ يَطِيحْ وَيَجْدَبْ ...
رَانِي فْزِينَكْ
كِيفْ الرْبِيعْ فْنُوَّارُ
بَلْوَانُ غْرِيبْ مْعَدَّبْ...
رانِي فْزِينَكْ
كِيفْ الشّْتَا فِصَبَّانْهَا
بْرَقْ وَرْعَدْ يَتْگَلَّبْ ...
حْظَرْ خْيَالَكْ
غَطَّ خْيَالِي
فْجْنَانْ مْزِّينُ بْوَگْفَة
فْعَيْنْ العَاشَقْ
بْحَالِي
بْسَرّْ زِينَكْ
مْنَگَّبْ ...
رُوفِي بَوْصَالَكْ
وَشَمِّي هْوَايَ
قُزْبُرْ فِرِيحَةْ لَقْرُنْفَلْ
وَكَمّْدِي تَسْوَالِي
فْزِيفْ سْلاَمَكْ
يَصَفِّي مَايَ ... بْغِيتْ نَشْرُبْ
حَدِّي نْسَلَّمْ عْلِيكْ
مَنْ حَطَّةْ بُويَ
لْحَطَّةْ بُوكْ
الى انْتِ كُدْيَة
أنَا جْبَلْ
فُوگِي ثَلْجْ
دَابْ فْزِينَكْ
عْلِيَ غَابْ وَهْرَبْ ...
دَمْعَة مَنْ هَادِيكْ العَيْنْ
تْبَعَّدْ لَحْزَانْ عْلِيَّ
خَطْوَة مَنْ هَادِيكْ لَگْدَامْ
تْفَاجِي الهَمّْ عْلِيَّ
غَرْبْلِينِي بِينْ يِدِيكْ
يَطِيحْ صَبْرِي فهْوَاكْ
وَيَبْقَي حُبِّي
نْجُومْ ضَاوِيَة عْلِيكْ وَعْلِيَّ ...
بْهَاكْ رَحْبَة
لِّلي مَا يَتْبَاعْ وَلاَ يَتْشْرَا
حْرَامْ
بْهَاكْ مَحْرَكْ
خَيْلُ مْسَرّْجَة
فتْبَوْرِيدَة عَلاَّمْ
بْهَاكْ زْنِيگَة
وَرْدْ وَبَلْعْمَانْ
فَايْحَة بنْسَامْ
بْهَاكْ فِيَّ وَفِيكْ نِيَّة
وطَيْرْ بِجْنَاحَاتُ
طَارْ فسْحَابْ سْمَايَ
كْلاَمْ
وَانَا يَا لاَّلَّة
صْفِيَّة فصْفَاوْتَكْ
حْلِيبْ رَضَعْتُ فْصُغْرِي
وشْرَبْتُ فْكُبْرِي
مَنَّكْ سْلاَمْ
صْفِيَّة
هَا خَدِّي حْصِيرَة تْفَرّْشِيه
هَا كَفِّي عَاهَدْ تْوَسْدِيهْ
هَا گَلْبِي مَهْرَازْ دُگِّيهْ
هَا رِيحْتِي مَسْكْ شَمِّيهْ
هَا خَلْوَتِي احْلاَمْ سُكْنِيهْ
وَدَفِّي عَاهْدِي
بِينْ عَاهْدَكْ
عْلَى صْدَرْ لَمْحَبَّة ... صُونِيهْ
جَيّْرِي اقْبُبْ بْعَادِي
يبَانْ خْيَالِي
عْلَى زِينْ بْهَاكْ
مْسَاوِيَّة ...
حَرْمْلِي رْجَايَ فْرْجَاكْ
بْحَنَّة عَزْبَة
عْلَى غْرُوبْ الشَّمْسْ هْدِيَّة...
وَانَا فَصْفَاكْ يَا صْفِيَّة
صْفِيحَةْ بَابْكْ
نْضَرَّگْ العَيْنْ المَحْسَادَة
فشْرُوقْ زِينَكْ
نَحْظِيهْ
وَأَنَا فَصْفَاكْ يَا صْفِيَّة
كْلاَمْ حْدِيثَكْ
نَدْوِي بِيهْ گُدَّامْ
لِّلي يَبْغِيكْ وْلِّلي مَا نْوَا
فَحْرُوفَكْ شَهْدَة
بَعْسَلْ العَاشَقْ
نْگَطَّرْ لِيهْ
سَاعْفِينِي
نَلْگَاكْ
عْلَى عَتْبَةْ الشُّوقْ
عْرِيسْ فَمْنَامُ قَيْسْ
فْلَيْلَى
گَمْرَة ضَوَّاتْ مْكَانُ ...
سَاعْفِينِي نْشُوفَكْ
عْلَى دَاكْ الوَادْ فْرْحِيلُ
مَا.. وَحْطَبْ وَحْجَرْ
سْلاَمْ
رْبِيعْ عْلَى جْنَابُ
حْدِيثْ اللْسَانْ ...

صْفِيَّة
سْلاَهَمْ لَقْبِيلَة بْلَهْدِيَّة جَايَة
تْبَارَكْ .. بَبْيَاضْ لُونْهَا
بالعَادَة نْجَمْعُوا الشّْمَلْ
والمْرْفُودَة زْغَارِيتْ
واللَّمَّة شْمُوعْ
ضَوَّاتْ بْنْوَارْهَا
رَبِّي يَصُونْهَا ..