ورْقَتْ الهم ولَفْراحْ

وَرْقَت الهمْ ولَجْراحْ

ورْقتْ الهمْ ولَجْراحْ

شحال وشمْتي عل صدْركْ من أوشامْ

وعْدَمتي ناسْ الحقْ لَمْلاحْ

ولاوجْدو لْقْوالهمْ رايمْ

وشحالْ منْ ظلَمْ عل سطوركْ طاحْ

وتْسرهطو وتنوعرو ولاعاشْ ظالمْ

قبورهم بينْ لمْقابرْ ساحْ

وشحالْ من حبْ ولعشقْ ولغْرامْ

تعبْ مولاهْ وجاحْ

وهامْ ف دروب الاوهامْ

عل بياضك جالو لفْكارْ

عل بياضكْ مدحو لقْمارْ

عل بياضكْ شبهو لعشيق بنوارْ

وعل بياضكْ خانو لشْرارْ

وشحال من دعوا فيقتي بها لجْراحْ

وكانتْ سبابْ موتْ بنادمْ

شحال لَقْلمْ جارْ عليكْ وراحْ

وخلا مدادو ف بياضكْ عايمْ

خانكْ وقْبلتي لَمْزاحْ

مدى ما غركْ لقلمْ يا بيضا

وزاغتْ ويدان وطرقانْ

زور ونصب وقْلوبْ مريضا

من شراجمْ شعْلات نيران ودخانْ

كَْداتْ كَادية بحروبْ نايْضة

ولاسلمْ منها أيّ كان

ماكان بودي نْسقْسيكْ وانت كَدامي

ولالَقْلمْ بينْ صبْعان

بيكْ وبيهْ ندونْ كلامي

واسبابكم هو الانسانْ
عبد السلام البعليوي 3/6/2010