بَرَّحْ لْبَرَّاحْ
فْسُوقْ لَعْفِيطْ بَنْعَايَلْ
وُلِّي رَاسُو فْقَبُّو
طْلَقْ وَدْنُو لَسْمِيعْ الْحَايَلْ،
النَّاسْ وُالسُّوقْ مَدْهَيِّينْ
بْبِيعْ لَكْلاَمْ أُوشَرْيَانُو
الظَّلْ مَشْرِي بَقْيَاطَنْ
آوْثَادْهَا تْعَكَّلْ صُخْرُةْ المَزْرُوبْ
وَلِّي قْيَاسُو فْجِيبُو نَاقَصْ،
رْجَالْ وَ عْيَالاَتْ
مْجَرْجْرِينْ لَعْيَا وَعْيَالُو
رَاكْبِينْ هْبُوطْ الحَدْرَة وَطْلُوعْهَا
مْشَنْقْلِينْ الصَّيَارْ وَصْخُرْتُو،
فِيهُمْ لِّي سَابِقْ السُّوقْ بْلِيلَة
مْطَيَّشْ بِيعْتْ عْرَصْتُو
فِيهُمْ لِّي يْبِيعْ الرَّﯖـمَة
بَاشْ يَاكلُ ْسِيمَانْتُو
وُفِيهُمْ لِّي يَشْرِي
قْوَاْم الرْﯖـمْ أُورَﯖـامْتُو.
لْوَادْ دَمُّو احْمَرْ
بَبْهَايَمْ غْدَرْهَا لَمْضَى
السُّوقْ كُلُّو تَصْنَاكْ
مْنِينْ دْخُولَكْ يَالِّي رَاسْ مَالُو
عَيْن أُوﯖـرْبَة
وُحْضِي سْوَانْتَـكْ
يَالِّي جِيبُو مْقَرْقَبْ
رَدَّقَّة مَبْيُوعَة
وُالسَّوَّاقْ بَرَّانِي.
بَرَّحْ لْبَرَّاحْ
فْ صَيْفْ عَرْﯖـُو قَاطَرْ
الشَّحْفَة مَنْ لَعْيُونْ سَايْلَة
تْقَلَّبْ عَلَى تَضْلِيلْةْ اللَّبَّانَة،
كُلْشِي هَمُّو فْ شْوَارِيهْ
وُلِّي قْرَابُو خَاوِيْ
أشْمَنْ رْجُوعْ لِيهْ
أوَكِيدَيْرَا مْرَقْتَكْ
يَالِّي نَاسِي عَطْرِيتُو.
حْنَا مْسَوْقِينْ السُّوقْ
وُالسُّوقْ مَمْسَوَّقْ لِينَا
هادا زمانو شوم
يطيح الطير من لعلالي
هَاذَا يَّامُو خَرْبَة
مْسَكَّنْ حَالْتُو فِيهَا
وُلَخُرْ مْقَرَّقْ حْمَامُو
عَلَى بِيضْ لَحْنُوشَا
نَاوِي يْبِيعْ الطْيُورْ الطَّايْرَة،
لَقْلاَلَشْ مَّلْحَة لْمَخْضَة
الصَّهْدْ مْرَيَّبْ حْلَبْتُو
وُرْوِينْتْ الوَالْدَة مْرَوْنَة فَزْرَعْ
مَنْتُوفْ بْلاَ مْنَاجَلْ،
لَهْبِيشْ هْنَا وَلْهِيهْ
وُلْمَقْرُوسْ بَشْهَوْةْ الْمَا
ضَايْتُو نَشْفَاتْ
وُالزُّغْلاَلْ يْفَرْكَلْ فِيهَا،
هَاذَا حَالْ السّْوُقْ وُمَّالِيهْ
كُلْ َعَمْرَة يَتْخَصُّو قُومَانْ
أُوْيَتْزَادُو شَلَّة،
أُولَعْبَادْ
هَالِّي مْسَلَّسْ
هَالِّي مْحَلَّسْ
هَالِّي رَاكَبْ رْوَايَدْ
مَرَّة تْدُورْ مَرَّة تَغْرَقْ.
بَرَّحْ لْبَرَّاحْ
جْنَابْ السُّوقْ مْشَكْلَة
لَقْلُوبْ مَشْوَيَّة فْ شَوْيَانْهَا
وُلَكْبَادِي مْلَفَّة
فْشَحْمَة مَاشِي مَنْهَا
لْخُبْزْ عَاجْنَاهْ لَفْرَاكَحْ
أُوْبَيْعَاهْ لَيْدِيَّاتْ،
تْكُومِينَة تَخْلاَطْ مْلَّحْ
حْرُورْتُو تَلْهَدْ
وُلْبَرَّادْ شِيخْ الْـﯖـلْسَة
مْشَرْشَرْ ﯖـانْتُو نَغْمَة
فْ كِيسَانْ مْشَرْشْفَاهُمْ
شْنَايَفْ سْبَايْبِيَّة
وُلِّي بَيْعِينْ لْمَبْيُوعْ وُلْمَبْيُوعَة.
وُالسُّوقْ دُوخْتُو دَايْرَة
الحَجَّامَة مْلاَهْيينْ فَرْيُوسْ
حَالْفِينْ عَلَى زْبِيرْ الزَّغْبَة،
لْـﯖرَّابَة مْقَرْقْبِينْ لَعْطَشْ
فَنْوَاقَسْ تْعَطَّشْ لِّي مَاعْلِيهْ بْ مَا،
لْـﯖـزَّارَة سْقَايَطْهُمْ ﯖـْوَامَلْ
فْ عَيْنِينْ لِّي نَاقْصَاهُمْ الهَبْرَة
وُلْعَطَّارَة مْبَنْنِينْ
مْرَقْتْ لِتَدْوَازُو نَاشَفْ.
بَرَّحْ لْبَرَّاحْ
السُّوقْ سِيمَانْتُو سَلاَتْ
جَبْدُو وْتَادْكُمْ ألْعَزَّابَة
رَاتَسْوَاقْكُمْ سَالاَ
لِّي رْبَحْ
صَيَارُو مْسَوَّقْ
وُلِّي خْسَرْ
مْحَنْتُو فْعَيْنِيهْ
يْقَلَّبْ عَلَى تَـشْطِيبْةْ الخَضَّارَة
شَنْتِيفْ لْـﯖـزَّارَة
وُزْرَعْ بُوزْغَيْبَة
لِّي تْنَقْيَاتُو
يْحَفِّي بْصَرْ لَمْرَة وَدْرَارِي.
هَاذَا حَالْ السُّوقْ
وُالسُّوقْ مْحَايَنْ مَعُمَّرْهَا تْسَالاَ،
السُّوقْ رْزَقْ وُبْوَابُو تَرْزَاقْ
وُالسُّوقْ بْحَرْ حُوتُو بَلاَّعْ
حْضِيوْ رَاسْكُمْ أسَّوَّاقَة
رَلْبَرَّاحْ مْبَرَّحْ
وُشِي عَيْنِينْ نَاوْيَا تَخْلِيهْ
لْوَدْنِينْ مَطْلُوقَة فِيهْ
وُلْبَرَّاحْ بَايَعْ الْهَضْرَة
بَلْسَانْ لَغْوَاتْ.
12/10/2008**2/11/2008
