خُودُو خواتمكم
ودبالجكم
خُودُو زوالغْكم
وخلاخْلكم
خْتْمُو على قلوبكم
سَدُّو ودنيكم
وسْلسْلُو رجليكم
رجعو تمركم وحنتكم
صدْقوها ف المدافن
على رواحكم
خليو لي غير
خيط حرير
منسوج بضَوْ الكَمْرة
ومرصع بنجوم الليل
نديرو تسبيح
نلَطَّف وندعي
عليكم
عْطيوْني ربيع
يابس وخضر
وجمر شَاحْد واحمَر
نكوي بيه جْباه
الغدَر
اللي ركبتو عليه
وجابْكم
آش بيني وبينكم
ما نتما شْكَوْتي
مانا لْبَنكم
آش خلط دقيقي
بخْميرتكم
وشبَابي بشِِيبْكم
مانا سْلعة
مانا بضْعة
مانا ضَرعة
فين مكُّونَة
بنت مكُّون
تشوف المكْنون
لي دَان
ودنْدَنْ
ودوَّن
ومشَا كوَّن
وملي نجي شاكية
مظلومة
مهضومة
مضيومة
مصدومة
صدْري يقطَر حليب
وجرَّا قْطِيبْ
ما من ظْهَر حبيبْ
وْوَاكْلة المعلومَة
يخبَطْ بمطَارْق
على خشَب هاري
من دَمْع نْسَا ودْرَاري
يكَوُلي
بصَوت غليضْ
عيونو خارجَة بِيض
سيرِي
يا لمجنُونة
الملعُونة
المعفُونة
رجْعي
حْكَم الحاكْم
حيَّة مِيّْتة
عايْشَة مدفْونَة
