الرِّيشْ فْ دَمِّي طَايَرْ
لَهْدُورْ دَايْخَة سَخْـفَانَة
وُحْسَابِي مَعَ رَاسِي تَالِي،
تبْلِيتْ باللِّيلْ هَلْكُونِي نْجُومُو
حَتَى سْطَرْ مَا كْتَبْ كْلاَمُو،
النَّاسْ فْ النَّاسْ
أُوكُلاَّ هَمُّو فْ جْوَاهْ
الْخُو غْسَلْ يْدُو مَنْ دَمُّو
وُالْبُو حَيْطْمُو الزْمَانْ
ﯖـالْ نْتَوَكَّلْ تَنْكَلْ
وُلَمْرَا وْثَادْهَا فْ ضْلُوعُو دْمَاوْ.
زْمَانْ شْكَايَرْ بَلاَنَا
لِّي مَاعَنْدُو شُكَّارَا رَاسُو مَقْطُوعْ
كِيفْ لَحْنَشْ يْعَضْ فَتْرَابُو،
القَلْبْ مَعْدُورْ مَسْكِينْ
بْلَوْهْ بالْحُبْ تَّغْدَرْ
وُالعُشْ مَابَيَّضْ فْرَاخْ،
نْسَا وَرْجَالْ بَهَاتَتْ يَّامْهُمْ
كُلْشِي مَقْلُوبْ سْلاَهْ عَلَى عْلاَهْ
الرْوَايَدْ جَايْحَا، فَدْغُلْ غَارْقَة.
هَالِّي فَنْهَارُو مْصَيَّدْ هْمُومُو
هَالِّي جَارْحَهْ الْمَلْحَة
وْهُوَ غَارَقْ فَبْحَرْ مَايْبَرِّيهْ
هَالِّي لاَبَسْ اللِّيلْ حْلاَسَة
مْبَرْدَعْ بْلَوْعَاوَعْ
دَبْرَا عَلَى دَبْرَا
نَارُو شْمَاتَه مَاتَبْرَا
وَ حْيَاتُو سْمَقْ طَالِي كْعَابُو.
أوَحَيَّدْ عْلَيَّ مَاعَنْدِي دْجَاجْ
مَارَاسِي فْنُخَّالْتُو،
لَهْدُورْ كَثْرَاتْ وَلْسَانِي آحْدَجْ
مَانَبْلَعْ رِيقُو،
عَدِّيتْ لْبَارَحْ مَلْيُومْ
لْـﯖـِيتْ الرْزَزْ فُوقْ الرْيُوسْ مْقَنْزْعَة
وُمَسْكِينْ لَعْقَلْ طْلاَمِيسْ فَجْعَابُو.
مَابَاغِي وْتَادْ
أشْ هَادْ الزْمَانْ أشْ هَادْ لَوْلاَدْ
كُلْشِي تْجَلَّحْ وُلَخْبَارْ فْرَاسَكْ!!!
طَلِّيتْ عَلْﯖدْرَهْ
لْـﯖـِيتْهَا حْلِيبْ فَايَضْ مَفْتُولْ طْعَامُو
وُلَحْنِينَة لِّي فَتْلاَهْ
شَاهَدْ قْبَرْهَا فْﯖلْبِي،
بْشِيتْ لْرَّحْبَة لْﯖِيتْ الدَّرْسَة طَايْبَة
و الزْرَعْ يْدَرِّي فْغْبَارُو.
أوَفِينَكْ ألَيَّامْ!
هَادْ الزْمَانْ صْﯖعْ مْصَنْـﯖـعْ
لِّي حْرَافَتْ لِيهْ يْدِيرْ عْصَاتُو فَرْوِيدَا
كُلْشِي بْغَا يَحْكَمْ
كُلْشِي بْغَا يَدِّي مَنْ تَﯖرِيعَا
وَدْبِيحَة جِيفَة لاَصْقَة عَلْهَيْدُورَة،
أوَ فِينْ اللْحَمْ ألَمْجَاعِيفْ!
أشْ سَمَّنْتُو مَاتْـﯖـدْدُو؟
أشْمَنْ رْحَا تَطْحَنْ بْشَنْتْكُمْ.
وُشْوِيَا بْشْوَيَّة
طَلِّيتْ مَلْبَارَحْ عَلَى رَاسِي
لْﯖِيتْ قْزَادْرِي حْلاَمْ مْصَدْيَة
لْـﯖـِيتْ وُلْدْ لَمْرَة فِيَّ شْفَايَة
لْـﯖـِيتْ حْاِيبْ مّْيْ مْصَيْكَكْ بِينْ ضْرُوسِي
وُلْـﯖـِيتْ بُويَا قَاتْلَهْ الْحُـﯖـرَة.
بْشَا زْمَانْ أُوجَا زْمَانْ
زْرَعْتْ النُّخَّالَة وُﯖــلْتْ النُّخَالْ
رْكَبْتْ رَاسِي أُوتْغَطِّيتْ بْلَعْجَاجْ
سَّاعَة لْـﯖـِيتْنِي عَرْيَانْ
مْغَطِّينِي اللْحَمْ وُعْظِمَاتِي رْشَاوْ
ﯖـلْتْ مَعَ رَاسِي مَالْ الرِّيشْ فْ دَمِّي طَايَرْ!؟
مَانَا جَوْشْ مَانَا حَجْلَة
مَانَا وُلْدْ بَلْعْمَانْ.
نُوضْ أوَنُوضْ
رَلْﯖلْبَة مَازَالْ دَايْخَة فِيكْ
وُهَادْ لَمْجَاحِيمْ كْلاَوْكْ وُتْحَسَّاوْكْ
صَابُوكْ مْبَرْدَعْ
ﯖالُو أرَاكْ لَنْغِيزْ
نْقَطْعُو بِيكْ مَنْ هَادْ الدِّيزْ لْدِيكْ الدِّيزْ.
أوَزْمَانْ هَاذَا شِي يَحْفَرْ لْشِي
وكُلْشِي مَرْدُومْ فْتَخْمَامُو
وُلْدْ لَمْرَا الْيُومْ
هَازْ دَمُّو تَحْتْ ﯖدَامُو
فِيمَّ يَعْفَطْ يَطْلِي الطْرِيقْ
وُرْيَالْ حَالَفْ يَتْقُبْ جِيبُو
وُجِيبُو مْغَرَّزْ تَغْرَازْ الخَيْشْ،
وُبَنْتْ الرَّاجَلْ فْ الدَّارْ بَيْرَا
رْكَبْهَا لُعْﯖرْ عَذْرَى
وُغْدَيْدَهَا فْكُمْهَا
هَازَّاهُمْ بَتْشَامِيرْ.
وُحِيتْ الرِّيشْ فْ دَمِّي طَايَرْ
تْقَبْتْ الطَّارَا وُنْغَمْتْ عَلْبَنْدِيرْ
غَوَّتْ عَلْ لَوْلِينْ مَاجَوَبْنِي حَدْ
غَوَّتْ عَلْ تَّالْينْ كُلْشِي مْهَيْدَرْ،
بَيْدَرْتْ بْرَجْلِي لْﯖِيتْنِي مَارَاكَبْ عْلَى وَالُو
ﯖلَبْتْ الشُّوفَة وُهَزِّيتْ الشَّوَّالْ
وُﯖـلْتْ نْدِيرْ مَادَارْتْ العَـﯖـرَبْ
لْكِيتْنِي مْجَنَّحْ أُو سَمِّي بَارَدْ.
أوَفِينْ غَادَا هَاذْ لَيَّامْ الزُّغْبِيَة
الدُّبِّيزْ شَابَكْ وُكُلْشِي مْخَرْمَزْ،
الدَّيبْ مَاقَهْرَاتُو غْنَمْ
وُلَغْنَمْ مَابَاقِى فِيهَا غِيرْ لَبْطَايَنْ،
لَعْبَادْ فْلَعْبَادْ شْفَايَة
شِي صْلاَتُو حَضْرَة
شِي كَاسُو فَقْرَعْتُو دَايَخْ،
بْشِيتْ لَرْبَاطْ طَلِّيتْ عَلْ لَبْحَرْ
شَفْتْ فِيه سْلاَ غَارْقَة فَجْلَوُلْهَا
عَيَّطْتْ عَلْ غِيوَانْ
وُﯖلْتْ لِيهُمْ الجْمَالْ مَازَالْ جَايْحَا،
وأنَا مَاشِي شْرِيتْ سْوَارْتِي بَيْدَيَّ
وُﯖلْتْ هَنْيَا وُرَاحَا
حِيتْ حَمَّامِي بْحَالْ دْخُولُو بْحَالْ خْرُوجُو
وُسَعْدَاتِي يَانَا
حِيْتْ قَبْرِي فِيَّ مَحْفُورْ
وُالرِّيْشْ مَازَالْ فْ دَمِّي طَايَرْ.
6-7/8/2008
