علام الغربة كحل هدام
هاز سيفو
وقاصدني ناوي الزحام
وانا تالف
نرصع فطروزو
نقاد الحرف
كيف الخيط من الصوف
ونجرو يشد طريق النيارة
معا الحروف
نخلط صبايغو
نقاد لوانو
وهو بلا عيب ناوي لغدر
يمحي للوان
ويهرس سنان الخلخال
لما يجيه لحال
ويقاد كيف المجدوب الزواقة
وينسى يجر روح من كصبة
بلا بيها ما يطلع منسج
ولا تقاد لوان
بلا بيها ما تطلع
سومة الزواقة فالدلالة
بيها يتناحروا سياد الرجال
بيها القاضي فالسوق دلال
بيها يختم الدلالة
ولا سومة فوق كلمتو
كيف الطرزة عل السدا
كيف الروح ساكنة الكسدة
وتكرج المنسج
والخلخال رجع لحالو
لا هوا حضر فدلالة
لا هو قاد السومة
والحالة
ولا شكروه ناس الحال
قالك بغيت نكون
علام الغربة لكحل
ومانزيدك على حالك
حال السومة والدلال
يطلعو السوق
ونتا سيد الحال
وسنان الخلخال
والغادية والجاية
من سدا وكسدة
فحضرة ما يفهمها
الا حكيم وغراب
تفرش التراب
وتغطى بالسما
واخا زرقا كيف
رسمها الخلخال
هجرها اللون وخلا للوان
للالة
وغاب
