طربوش الحية

موضوع: طربوش الحية الخميس يناير 27, 2011 5:13 pm

طربوش الحية

***

هرق دمي من لحمي

سال من لمحال

هازني الما

لقيت روحي فوق حروفي

ساكن خوفي

هارب

من الوحدة

نية

زماني فايتني ب مياة عام

ولا اكثر

انا مازال ماخلقت ب شهر

الشيب

فراسي ينقر

الحال مخنشش

عوال ينبش

عطيتو عيني

اعطاني صباعوا

اعطيتو قلبي

اعطاني وجاعوا

الباز يفقص الباز

الدباز دباز

دقو بالمطرقة ولا بالمهراز

ندمت علاش خرجت للريح

رجعت بحالي لصغري

لقيت عنصر

مالقيت واد لي يوصله

للبحر

نقرى عليه اشعاري

نحكي له اسراري

نخليه لجاري

سايل

حتى يشربوه الدراري

لي كال

حر ف الما

قرش ف لبحر

لي كال حر ف السما

بازونسر

لي كال حر ف الكتبة

ايوا يكر

التنهيدة لذيذة

ماقلناش لا

فين هي الفيذة من لكلام

شلا

نشوة الهدرة ماتشبع الدات

نعطيكم لي جاي

اعطيوني لي فات

نعطيكم لي حي

اعطيوني لي مات

الزاوية ف راس الجبل

وانا زايد ونهبل

رجليا

رزمو

وحملي يزيد يثقل

بغيت نشم رماد النجوم

طلاتني يامي بالحموم

خنقتني دوك لغيوم

لمكالية ريحي

الحابسة اعجاجي

لمخربقة مجاجي

لجمدة بحري

ومواجي

رني ندور ف بلاصتي

ك زوبعة ف هوايا

نحرك غباري

نشطب ارض خيالي

نجبد وحدي عباري

بيدي

نخلط دوايا

على قد الشوف

على قد الخوف

ماشي ف غدا

متلوف

دخلت على كانتي

بشراع الما

ودموع الحلمة

وصداع الدري

الساكن معايا

من صغري

فين هي لمرايا

يالفاهمني

يالرافد لفهامة

يلا صبح الما

تولي عليك

بالندامة

قال لي معايا:

لي بغيتها خليتها ورايا

قال لي حدايا:

لا تصدق الحجايا

حالة الما حالتها
حالة

وحالة العز

مدبالة

لفقي مور الباب
دفع الباب يبانو السطولا

وفركي ضلوعك

يالهجالة

وذاك الساعة عيط عل الغياطة

وعل الطبالة

لي كال فهمني

نعطيه دماغي

نعطيه يد مهرازي

يهرس قشور الكلمة

يعرفني اشنو

باغي

قالو:

كل اللحم بدمو

لا تاكل الحوت بسمو

العميان يكود لبصير

للجامع للكبير

سلاس

بجوج طاحو ف بير

انا عاطيها للشوفان

يبان ما يبان

رافد سلاحي

وحاضي الطرقان

مانقد نهضر

خايف من الغاشي

مونس الصبر

الوقت مزروب

ماشي

رافد سيف المنكر

بنادم معاه يقاسي

كايتسنى لفجر

القبلة فين ماعطيت

راسي

نطلب السماحة من الما

ونستغفر

هذا مكتوبي

هذا مالقيت ف كراسي

هذا ما خلاو عشاق لكراسي

الثقافة

مكركبة

مدردبة

مكورة

ف الحافة

معنصر عليها

التلاف والتلافة

عاونو الفرقة

كوات قلبي

مرضت المعدة

بالحرقة

كل لاعاب رافد صينية

وزلافة

ايوا نرجع نتلوى فراسي

نوسد خيالي

ونبقى حاضي

يلا تخصمت مع راسي

عند الصلح مانحتاج

لقاضي

مرة مرة نسافر مع الكشافة....

المفضل الياموني 2011/27/1

زجال عدد الرسائل : 119 تاريخ التسجيل : 05/10/2010

العزيز المفضل الياموني , اسمح لي ان اقول لك ان هاته القصيدة من درر ما كتبت , وحكمي ذلك ليس تنقيصا مما قرات لك , زجلية جميلة بصور باهية , واد زرزاح
واللي رخى عظامو معاه
داه بلحمو
قراتها 4 مرات واعجبت بها كل مرة اكثر شكرا للاتحاف

مشرف عدد الرسائل : 1048 تاريخ التسجيل : 26/05/2007

نعم هي قصيدة زجلية جميلة ممتعة

موفق أخي

العزيز سيدي عبد الاله الخديري

لمجاج كيتكاد لما كيقولي شي حد طربتيني

هذا هو الرباح عندي..

نتمنى ديما نكون موفق

كما كنتمنى لك التوفيق كذلك..

محبتي لك بحجم روما.

موضوع: رد: طربوش الحية السبت يناير 29, 2011 1:17 pm

الاخت الكريمة الزهرة درار ..شكرا على المتابعة.

الزجال المتميز المفضل الياموني
يعجبني تعمقك الفريد هدا في المعاني وانت تأخدنا إلى عالم الفن الرائع بكل أحواله
لك مني كل التقدير صديقي العزيز

الزجال المحترم محمد بوبكر

انت معنى الروعة..

شكرا على وقوفك الى جانب النص

شكرا على كلامك المحفز دائما..دمت بهيا ..