فتيحة الدرابي
عدد الرسائل : 442
تاريخ التسجيل : 21/02/2011
 | | موضوع: السعد لمعوج الثلاثاء أبريل 12, 2011 6:19 pm | |
| الشمس غابت مورا لغيوم
ضرقها السحاب وتشتوا النجوم
موراهم طاحت وناضت
يوم مورا يوم
نهارها مظلم ومضيوم
فين ما تلقى لخيطها الراس
تنوض من النعاس
يتخبلوا لخيوط
وضربوها لحيوط
عش فيه الكز
بارد وسارد
اوكر ما احطب ولا اجمر زاند
مكانتها موريها امعاند
بحرها مواجو هاجية
ما عندها حد
وفين غادة تصد
دواخلها هضرت الناس مهيجاها
عافسة على قلبها
تبكي ما تشكي
شوكة ف حلقها داكاها
جرحها سارطاه وامبلاه بدفالها
بمسبت السم اللي اعمر بيه الراس
والكلب اللي الدك فيه الرصاص
بمسبت السعد لمعوج
بمسبت لوتاد
والسعد اللي ما ابغ يتكاد
خسرت لفلوس
ذبحت العتروس
قلبت على جنة الفردوس
قلبت اهنا ولهيه
بغات منين الدوز
بابها مسدود
بقفل من احديد
مدفون ف الروضى المنسية
ولا امعلك ف اجبل عالي
ويمكن مليوح ف الثلث الخالي
ويمكن اتلف الساروت
وعشش اعليه العنكبوت
احرمها من الضنا الغالي
ما خلات لا افقيه ولا اطبيب
خوات اعليه الجيب
ف كل مرة نجمها إيغيب
نهارها واعر واعر وقاهر
تحطت بين المطرقة والسنداد
اكثر اعليها الدقان
تموت وتحيا بسبع ارواح
اتهمد لجراح
واخ ازمان معاها يقصاح
جربت التلقيح
كلام الطبيب ما اطلع اصحيح
ما اتلقح البيض
ما جا لوليد
ولا سماتو سعيد
كان حلم بعيد بعيد بعيد
ما قدرت تكون أم
ترضع وتحلم
تحلم بلولاد
واولاد لولاد.
| |
|
مريم الوادي
مبدعة مشاركة في أضمومة الخاطرة والرسالة الأدبية
عدد الرسائل : 313
العمر : 47
Localisation : فاس
تاريخ التسجيل : 31/03/2011
| | موضوع: رد: السعد لمعوج الأربعاء أبريل 13, 2011 9:53 pm | |
| زجلية جميلة جدا
تصوير متميز وقاموس رصين
كلشي بندب السعد المعوج حتى الشمس التي تضيء مساحات من النور
بوركت اختي
كنت هنا
مريم | |
|
فتيحة الدرابي
عدد الرسائل : 442
تاريخ التسجيل : 21/02/2011
| | موضوع: رد: السعد لمعوج الثلاثاء يونيو 28, 2011 11:12 am | |
| أختي الغالية مريم مرورك أضاء صفحتي أشكرك كثيرا ، تحياتي واحتراماتي . | |
|
