من الشك .
جيت...
نسال...
واش انا نيت..؟
ولا نسيت شكون نكون
طليت...
بغيت ندرك وجودي
يصفى خاطري
ونتيقن من حدودي
هاكي ...ذوقيني...
رشفة جافة
تمسح لهاتك
كسري بيها صيام الليل
لحين تذرفيني شضية
من ديك الشوفة البصيرة
الغارقة...
فقاع الحيرة
وتعالي...
من كون الابد البالي
فرشي فخيالي
ونطرحني عليك سؤال
ياك حالتي توريك حالي
وهاني سجين الحال
نفتح سراجم التاويل
نهرس لكلام
نعيد نبنيه تاني روام
نقطع قطعة من الليل
نرقع بيها لوحتي
وفلوحتي كتبيني شوفة بقياسي
ومن حساسي...
ننسج ايقاع
وانت ياعيني
يا عين اليقين...
كوني ميزاني
وهاكي خوذيني
تزودي مني
سافري ليا
لبر الشمس المنفية فيا
لفين يميل الليل
ويسيل الشفق من شق احلامي
ونسال ايامي...
وهي تجري عليا
والساق تلتف بالساق
كيف ندير
فملقانا فكبدة الفراق
