قبلو على هبالي

بغيت نجمع البحر
نحوزو فحجري...
ونخلي السواقي منو تجري

ونعيط للفلاسة يقلبو ع الشمس الغارقة
قبل تولي حارقة

بغيت سيدنا سليمان
يسلفني راس فنتة د الريح
نرقع بها تشتات مخي

هذ المخ لي مخرج لي عقلي...
زايدني تقلو ما قادوشي تقلي...
وما هاز من تقل

لو كان يقفل ... لو كان يتكبل
علاش جيت...نسيت

بغيت شي شوية دالدخان
نلوحو على عيون شي كليمات
عند بالي الدخان كيطر الكليمات
لقيتو كيطير العمر

نزلت للريالية

وطلعت للنص ريالية

وتشعبطت فالسريالية

لقيت مخي حافات لجبل عالي...
راسو يخنق
وجنابو تزلق

قلت لو امخي وديالي
الدق خدام فكل الاحوال في

قالي العقل لي كان يتفرقو منو العقول
واليوم ولى مهبول....
قبلو عليا وعلى هبالي....
ولا سيرو فحالكوم وخليوني فحالي