اعفط وسلك

عدد الرسائل : 442 تاريخ التسجيل : 21/02/2011

اعفط على كلبك وسلك
اسمعتها منو منها ومنك
اعفطت اكثير
و سلكت مع الغير
ما نحافي ما نعادي
ونرد الشر بالخير
وفي كل مرة نقول ما عاليش
على عملك غير سير سير....
انت مول القلب لكبير
الساعة لقيت راسي
ف عينين الناس اصغير
ظنوني ضعيف واحقير
خلاوني مهمش
ظنوني معمي وابصير
بلا عينين بلا مخ
وانا مخي عياه التفكير
وعينيا محلولين
نشوف ونميك
اندوز وانسلك
كل ما فيا من إحساس التهلك
خلاوني جوا بلا منجل
نمشي غير ف الظل
امغطي بغطى خيطو راشي
ف طريق الظلمة ماشي
ظنوني فريخ منتوف الريش
بلا عش ف شجرة منسية
بدلوا لي حتى السمية
ولاوا إيذكروني بالكنية
لبسوني جلد ما هو من سهمي ما يليق بيا
واش مازال نعفط ونسلك
ولا نفيق شويا
ونرجع كرامتي ليا
ما فادني لعفيط
ما سمعت غير الزفيط
لازم انوقف لعصا ف الوسط
ما نخلي الصغير ولكبير عليا يركب
ما نخلي لرياح كلها اعليا تهب
نعرف وقتاش نتهدن
وقتاش نغضب
وحقي ما نخليه لغيري
ليه نسعى ونطلب
ونعرف كيف نتعامل مع الإنسان
وحتى مع الكلب
ولا تلوموني
هاذ الدنيا شوفاتني لعجب.

موضوع: رد الأربعاء أبريل 04, 2012 10:12 pm

المبدعة فتيحة الدرابي
مزيدا من العطاء في الكتابة والابداع
تحيتــي لك

عدد الرسائل : 442 تاريخ التسجيل : 21/02/2011

أخي الفاضل بنعيسى الحاجي، شكرا على المرور وعلى التشجيع الذي به نستمد إلهامنا ونجدده كل مرة. تحياتي القلبية