الـــرجـــيــــــم *الحمية
اناس الطواجن والزرود أمن حمرو ا وشواو
ذاتي في حالة. ذات مغلوبة بشهاوي
من غير الرجيم ما لقيت للذات اصاح دوا
1
الركابي منفوخين طايبين من ثقل الذات لواو
حالتك بهدلا بـالمرارة ولكـلاوي
حالة لعدا ولحاسدين وكل ملا يسوا
المعدة والمصارن بهديرهوم تغرغروا و دواو
شكوة فوق شكوة تقول عامر شكاوي
يا و نفاخة حكيتها مزنطرة ماليها لهوا
لمفاصل هي اللورمات من الحكان رتخاو
حار فيها الطبيب ما عرف آش يداوي
ضرك ما يعدي الحاضرين انما بلوى
تصبح وتمسي كيف راد.عضيماتك رشاو
يدعيوك لله الشديد العظيم القوي
يا خد ليهوم لحق عن قريب ما توقف ما تـقوى
2
السكر دارفيك شغلو
وانت مغارد و بالزرود وبشهاوي
ليدام يزيد شر عملو
بالقلي والزبود وحرشة وملاوي
بريوات وكذلك سلو
كعب غزال وغريبة وصناف حلاوي
نعرف ناس الكاس تنشواو بيه عادو نبلاو
ولا هو قرينهوم فبيوت وفقهاوي
ما صابو منو فكاك ولا جبرو عنو سلوى
كيسانهوم منو مكشكشا اتملاو و رغــواو
لحد ما كروشهوم ضحات مثل رغاوي
كلها يشرب حتى يغيب ولا قدرعمرو يروا
حلفوا بايمنات كاملين لا تحركوا ولا تمشاو
خطوة تابعة خطوة بخطو رتيب مساوي
كيف مسافة الف ميل اول المسافة خطوة
عجبي من قومان كانوا بالرشاقة يتـنخواو
مشات النخوة بالشحوم السوق الخاوي
حال قطيب الخيزران والملاحة كمال النخوة
3
الضغط يزيد جهدو
هذاك الي صعيب للعادي والبادي
فالراس هدير رعدو
فـخدود وفـوجنات توجدو بادي
والذي يزيد فعـند و
ما فهم ما وعى ماجا بيه الهادي
رفع من الطعام يدو
وايلا ما فهم رقد كيف حال رقادي
الله يصبر نفسنا جميع علشهوات نتقواو
ناكلوا ونقيسوا وربنا هو لمـداوي
سبحانـو نزل لكل دا بقدرتـو كمن دوا
ما نخلطوا لمواكل ولا فوسطها نترواو
ما نحرقوا لكبيدة بخمر. ولا بقهاوي
ولا نتبعوا ماكلة بماكلة. هذيك هي الشقوة
الكرش مثيل الصبيان جاعـوا كان بكاو
وانت فيها عمال تلهي. واخداك سهاوي
ياك البطن اصاح شر كم حديث عليه دوى
التقليقة توريك حالتهوم دوك لي ما يتمعناو
خليهوم فغيهوم يعود بطنك عاقد طاوي
ما تشكي عـلة ولا تصيبك عمرك عدوى
4
ما ينفع طبيب وحدو
لو ما تعاونو.تقاصي وتدادي
هو يدري قياس حدو
بفهامتو مجرب. هاديك وهادي
لا تتردد قوم سير عندو
ما فيها حيا الطب من المعتادي
كلها يخلي ري جدو
لا يتقاضى عمرو فكمد و تنهادي
مايقتل غير لعمر كما حكاو القادمين ورواو
وكذلك كل كتاب منزل سماوي
والنفس امانة للذي على قتلها عمل و نوى
النعايم حلال ولمسرفين لحدود الحق تعداو
شيطانهوم فلجحيم على راسو هاوي
ما عمرو يستـعـاظ بوكرش سحوت و رشوة
وهادو ناس حلال كسبهوم باعواربحوا وشراو
سرفوا فحياتهوم عـيقــوا مواكل وكساوي
ما يدريوا بحالة الفقير. الذي بالجوع يتلوى
الصوم فشريعة ربنا بيه السابقين سماو
جوعوا تصحوا هكذا قال الراوي
من الطعام رفع يدك قبل تشبع هزها عنوة
الفيلالي هذاك جهدو
نصحت نفسي واهلي واولادي
كلها عقلو عندو
هذا ختام قولي العمدة فـالامادي
سلامي للشريف وحدو
طبيب لسقام هديتو عصارة مدادي
ومثيل ما قلت فلبدو
ملا خذا نصيحة عرفو بوجادي
كلها فتصريف وعدو
سبحان ربنا مقدرلقضا ولقضا ابدي
يجعلنا من لي يشهدو
شهادة لسلام وبالنبي سيد سيادي
لمكثرين شكرو وحمدو
لدوام نعايمو وعطاه فالسر وبادي
والجا حد ترياقو كمدو
منو ما سحا غير غا دي فعنادي
من رضاني نصيل ودو
بالمسك والزهر نهديه طيب ودادي
يا كريم ولا يواخد عبدو
غفر ما غفلت من اقوالي وانشادي
عبد العلي فيلالي بالحاج
