العيـــــــــا شــي
(شْكون اللِّي ماكيْعْرْفوشي؟)
العياشي من مجاذيب مدينة وزان (وأمثاله كثر في المغرب)كان يرسل الكلام على عواهنه
غير أن كلامه لا يخلو من طرافة وحكمة عفوية وانتقادات
لاذعة للمجتمع تلتقيه في الشارع أحينا فتسأله ويجيبك.. بمثل هذا الحوار المفترض..........
س: آش خبارك ألعياشي؟ = ج : الحمد لله على كلشي
" آشـنوخصك ألعياشي؟ = " ماخصنيشي وماعنديشي
" وباش عـايش ألعياش ؟ = " بالقنـاعة وهي كلـشي
" أجـي نقـلك ألعياشي = " لاتقوليـشي وما مجيشي
" ياكْ ما صـايم العياشي؟ = " الصيام دْ الله مانمسهشي
" بغيتْ نسـئلكْ ألعياشي = " سألني دْغية لا تطولشي
" مـالكْ زْربان ألعياشي؟ = "الوقتْ كاِلسيف مَيرحمشي
" مالك حفـيان ألعياشي؟ = " باش على الناس منعلاشي
" أشهـاد اللباس ألعياشي؟ = " ماعْريانشي مامكسيشي
" مالك جيـعان ألعياشي؟ = " الشبعانـين ماخلاو شي
" وفـين جارك ألعياشي؟ = " ودْنوصْمكة ماسمعنيشي
" وفـين دارك ألعياشي؟ = " دارالدنــيا ما مناشي
" ودار اللآخرة العياشي؟ = " فيها غَ يْتساوى كلشي
" وفين اولادك العياشي؟ = " أنا عزري ما مزوجشي
" ومع من عايش العياشي؟ = "مع الوالدة "قْلتْ الشِّي"
" كــتْهلاَّ فيك العياشي؟ = " قلت الشي راه كترشي"
" وفيـن خو تك ألعياشي؟ = " شي فْالقهوة شي فلمارشي
" جابوا النفـقة ألعياشي؟ = " بصحتهم. ماعطونـيشي
" إيـوا اطلبهم ألعياشي؟ = "نفسي حارَّة ما تْسمحشي
" وفين الرحمة العياشي ؟ = " رحمة تالفة ما تصبتشي
" والتعـــاون العياشي؟ = " رجل مريض مايوقفشي
" والتكـــافل العياشي؟ = " كيسمعوبه ما يعرفوشي
" قاري شويـا العياشي؟ = "راهم قاريين و مصبوشي
"اعليك بالحريك العياشي = "واخايحرقوني مانحرقشي
"خصك فــيزا العياشي = "أنا ف بلادي وماخرجشي"
" واشنهو الحـل العياشي؟ = " الحل محلول وما بغوشي
" دبر خدمــة ألعياشي = " ذراع الخدمة ماعنديشي
"واشــنو عندك ألعياشي؟ = "عندي ربي و مانسانيشي
" وْليـــكْ الله العياشي = "أما البشرْ مــا فيدو شي
"تبـقى بخــير العياشي = " أنا ويْاكْ والناس كلشي
الشاعر و الزجال احمد البُقيْدي
من ديواني(أزجال من وزان)
