الربح والخسارة

الربح والخسارة
ما يعق الوالدين غير من جماعة الحمقى
شحال من زلة تلقيه ويهز شحال من دقة
حتى دقة ماتوعيه راسو مايلين بمطرقة
شحال تعيا ماتنهيه دماغو بور مايتسقى
مايلقى مثوى يحميه كالكلب عايش فالزنقة
الريح اللي جايديه ديما عايش فالخنقة
وسخ حياتو بديه ماتنقيه الف خرقة
اللي حط فيها رجليه ماتنجح ليه حتى صفقة
ربي مايغفر ليه ويغفر لصحاب السرقة
ربي ماينضر ليه وينضر لشحال من فرقة
ففناهم لا تعزيه مايستاهل هاد الملقى
قادر ربي يفنيه من جاهنم مالو عتقة
مرضي واليه نبغيه ونحسبو من الشرفة
احبو ربي يرضيه ويرزقو حياة مترفة
فمرضو ربي يشفيه ويعاود ليه الوقفة
حتى حاجة ماتؤديه سالكة طريقو مطرفة
الدعا مستاجب ليه مقام الدعا فجبل عرفة
هم الدنيا مايغريه ويموت موتة مشرفة
القبر يتاسع ليه بقياس شحال من غرفة
مستاهل شفاعة نبيه ونبينا يوم الوقفة
على رضاهم كانحييه ونوصي بهاد الوصفة
اللي دار بيها تغنيه وتكون ليه خير او عطفة
من سقام الدنيا تشفيه وتزكيه بريح القرفة
مواعدو ربي يحميه ويجعل ليه دنوب مصرفة
الغافل لا تخطيه عفاك وريه وزن الكفة
لعمى سير اوخلليه ماهو جاحد بالصدفة
الخير تحزم ليه لاتخلي يد مكتفة
لبعيد تسابق ليه وخى يكون فارض الكوفة
فالدنيا غتجنيه ايزين فيك الشوفة
اينجيك من الجلا والتيه ايخللي الغمة مكشوفة
فلاخرة مواعد بيه تلقاه معرم بالصفوفة
اينجيك من مقام كريه اتنال تنارق مصفوفة
هدا كل تنبيه العمر قصير كيف الخطفة
اللبيب يتاعظ بيه قبل لا تسد ليه الدفة
فالختام سلام عليه محمد النبي المصطفى
زجل ياسين الجهوري