دارها لي " الشَّاط "

دارها لي " الشَّاط "

مقدمة :
الرجاء من الأخوات و الإخوة الذين سيضطلعون على المنتوج أن يسجلوا علي ما يلي
إني لم ولن أدعي في يوم ما أني زجال أو شاعر فالأحرى شيخ الملحون . و بالتالي فإني أضع نفسي تحت أقدام شيوخ هذه الفنون . والخط الذي سلكته مؤخرا هو فقط كتابة مواضيع . وسوف تلاحظون أن هذا المنتوج لم أصفه حتى بالقصيدة

[size=24]دارها لي " الشَّاط "

يا أهلي ، يا ناسي غيثوني
قلبي غدي يسكت فزوبية رماني
وعقلي حار و تاه ، ما بقى مني
أنا فعاركم ،لا دزوني
دخيلكم بحق لي خلكم و خلقني
أنا على بابو نرجاه يعيني
يفك خبالي من ورطة كنعاني
أنا راجل في الخارج خدام و ناشط
زين لخليقة ، و ف لعمر متوسط
على بنت ف "نيت" قلبي تربط
لي شاف صورتها وما تزوجها يسقط
وعلى حياتو وأيامو الجاية يسخط
البنت كاملة مكمولة ف الزين
قالت:محافظة على الصلاة عماد الدين
وكتصوم ديما لخميس و لثنين
محبوبة عند أهلها ومرضية الوالدين
قارية وصنعة عندها ف للدين
أخبرت الوالدة والحاج ، أبا لحنين
وقلت لهم:بطرو و خطبوها لي ف الحين
صيفطت لهم لفلوس و السمية وساكنة فين
مشاو،ف دارها كان أباها و أمها حاضرين
رشموها . لقاوهم من ناس مرفحين
وخا ما شافهوها . قالو هادو محافظين
راه ولدنا قاري وف بلاد العارفين
نزربو باش ما طير ونكونو من نادمين
ناب أبا علي ف ضريب الصداق
ومن بين لحوايج ، ذهب يبهر العشاق
للصيف و نهار العرس وليت مشتاق
ملي رجعت ودخلت لداري ، كثر التعشاق
من الفرحة شطحت وغنيت وشتت لوراق
سعدك خير منك ، قالو الحاضرين
طيحك الله ف نقلة . يحفظك من الحاسدين
غدا العرس والرواح و بعدو لحزام
سمانة عندي، هي لي بقاتلي من لعام
تمنيت نشوف عروستي وخى ف لمنام
حيث كلشي فرح وهلل بها ف لكلام
ف الليلة لكبيرة ، دخلت لبيت الرواح
دوزتها بكاء ف البالكون كثير النواح
لقيت امرأة ، أخنز من ريحة الملاح
يديها قاصحين . تقول يدي الفلاح
لا زين ،لا مجي بكري . كلشي باح
عكار وصلها للعنق أغلظ من البوطة
وكتمسح بكمامها فمها . دارتهوم فوطة
أش نقول؟ غيرغولة من كلشي مزلوطة
قربت لي،بكلامها بغات تبين لي مربوطة
ما نقرب منها . وخى يجلدوني بالمسوطة
لخليقة ، خليفة الله .لكن آش هاد العتبار؟
تخيلتها ف الأرض كضوي لقمار
تلف لي لحساب ، تهرست وسعدي بار
شكون يفكني ؟ غير الواحد الجبار
ثيقتي ويدي دارتها لي . سببي " الشَّاط "
ما كاين فيه غير صاط ماط
اشريت حوت خرج من لبحر شاط
نتوجه ليك يا حنين ،يا رحمان
بجاه الرسول محمد الشفيع العدنان
لي علمته ، وهو جاهل ، القرآن
تحل عقدتي . لا تفرج فيا لقران
تخرجني من هاد الوحلة . أنا إنسان
عبدك حميد،ضعيف الرجل واللسان
من مدينة سيدي قدور،لي ريحتو فاتت بوفكوان

حــمــيــد الــصــنــهـــاجـــــــي[/size]

موضوع: رد الإثنين يوليو 30, 2012 3:52 am

المبدع حميد الصنهجي
مررت بالنص واستمتعت بمضمونه الموضح للمتلقي
" آشدار ليك " الشاط
مزيدا من الكتابة والابداع
اخي الكريم يستحسن عدم تقديم اي تعريف بمجهودك الفني أو بمستوى مضمون النص تاركا للمتلقي فرصة
التفاعل مع صوره في النظم لما جاد به تصورك في ظل عشقك لهذا الفن من ثراتنا الشعبي الأصيل
تحيتي لك

أخي بنعيسى
أولا أبدا مما انتهيت تدخلك : إني لم أعرف بمجهودي ولكن أردت فقط أن أثير انتباه المتلقي أني لا أصنف نفسي ضمن الشعراء أو الزجالين وإنما قطعتي هي في إطار محاولة متواضعة تنتظر نقذا موجها و مصلحا

ثانيا أشكرك على تدخلك البناء الذي أعتز به . فأنت دائما سباق إلى المبادرات الطيبة .

لك مني كل تقدير و احترام ومتمنياتي لك بالسعادة و الطمانية والعافية بمناسبة شهر رمضان الأبرك

أخوك حميد الصنهاجي